A hming chu Cristiano Ronaldo. European Championship inelna palia goal khung thei hmasa ber

Portugal-in chhanchhuah an ngaih lai takin an captain a rawn ding chhuak a, a hming chu Cristiano Ronaldo a ni. Real Madrid forward hian Hungary an draw theih nan Nani goal khung tur a siam sak bakah goal hnih a khung a, Portugal-in European Championship knockout stage an lut.

Kum 31-a upa Ronaldo hi Euro 2004 khan Portugal tan a inlan tawh a, hetih hunlaia kum 19-a upa Ronaldo chuan goal hnih khungin an ramah Portugal chu final a thlen pui. Hemi hnu hian final thlen pui tawh lo mah se Ronaldo hian an ram hi Euro 2008 (Goal 1) leh Euro 2012 (Goal 3) ah knockout stage a hruai thleng ve ve a, kumin inelna nen Euro-ah goal riat a khung ta bawk. Portugal captain hi European Championship inelna palia goal khung thei hmasa ber a ni.

A hmunawm chuang e

Ronaldo ropui zanah Portu-gal an hmuhnawm a, anni ai maha hmuhnawm chu an khingpui Hungary an ni. Nilaini zana Lyon-a inkhel hi Euro 2016 bika match khata goal luh tamna ber a ni a, tun thlenga inkhel hmuhnawm bera chhal ngam a ni bawk.

Ṭan aṭanga minute 19-na lekah Portuguese midfielder Nani-a'n ball clear tumin Zoltan Gera zawnah ball a tauh a, Hungarian veteran midfielder hian box pawn aṭangin a ke vei lamin kawh zetin a hlap goal. Kum 37-a upa Gera chuan, "Uaiin chu a upat poh leh a tui tawlh tawlh ṭhin. Uaiin zinga upa ber chuan ṭhat lam a pan zel a, ka lawm khawp mai," tiin a goal khung leh a khelh dan chu thiam takin a sawi fiah. Fulham leh West Brom tan pawha khel tawh Gera hi goal a khung hian kum 37 leh ni 61-a upa a ni a, ani aia Euro-a pet goal thei upa chu Austrian midfielder Ivica Vastic (Kum 38 leh ni 256) chiah a awm.

Portugal tan inelna lian-tham-ah Ronaldo-a'n freekick pet goal thei lo mah se Real Madrid forward ball pass fing tak chu Manchester United tana a khelh pui ṭhin Nani-a'n minute 42-naah a pet goal a, first half-ah 1-1 a ni.

Knockout stage lut turin Portugal tan point khat a tawk a, amaherawhchu Hungary captain Balazs Dzsudzsak vangin an awm nuam sa lo. Turkish club Bursaspor winger Dzsudzsak hian minute 47-naah freekick aṭangin a khung a, inkhel a nung sawt bawk.

Minute thum hnuah Por-tugal-in an chhang let a, ding lam aṭanga midfielder ball thiam Joao Mario cross chu Ronaldo-a'n a kheng lut. Real Madrid forward goal khung hi player nazawng khung theih a ni lo a, keeper Gabor Kiraly dem theih a ni lo bawk.

Ronaldo goal khung aṭanga minute nga hnuah Dzsudzsak-a'n freekick a khungna vel bawk aṭangin a ke veilamin a pet lut leh a, goal khung tur hian Hungary captain hian freekick aṭangin wall pet per mah se ball per chu changlehin goal mawi a khung - goal luh vanga lungawi lo ber Ronaldo defending erawh a ṭha tawk lo!

Minute 61-naah Portugal-in André Gomes aiah Ricardo Quaresma an luhtir a, Barcelona winger hlui hian a luh aṭanga minute khatna lekah vei lam a-
ṭangin ball a vawrh lut a, Ronal-do-a'n chiang zetin a tauh lut.

Hungary-in team chhe zawk khelhin an khel duh lo a, kum 27-a upa Ákos Elek-a'n goal ban a pet per a, Portugal an vannei. Hun tawp hma thlengin inkhel a hmuhnawm chhunzawm a, injury time-ah erawh Hungary leh Portugal te an result-ah an lungawi tih a lang a, 3-3 in inkhel a tawp.

Portugal-in point khat an hmuh theih nana thawh hlawk ber Ronaldo chu man of the match-ah thlan a ni a, chutihrualin inkhel hmuhnawma goal hnih tho khungtu Hungary captain Dzsudzsak thiamzia hmuh hmaih a thiang lo.

Record chu

Ronaldo hi Euro inelna palia goal khung thei hmasa ber a nih bakah Hungary nena an inkhelh ṭum hi vawi 17 a inlanna a ni a, European Championship-a match khel tam ber a ni.

Portugal captain chuan, "Kan duh ber chu last 16 thlen a ni. Chutihrualin group hma-hruaitu nih kan tum a, thei ta lo mah ila kan duh ber chu kan tlin ta tho. Kan tan chuan zan duhawm a ni," tiin record aia knockout stage luh a ngaih pawimawh zawk thu a sawi.

Eng nge an sawi?

Portugal coach Fernando Santos chuan, "Kan sawi ṭhin Cristiano chu kan hmu ta. Hlawh-tlinna duh player a nih avangin goal a khung ang tih kha ka chiang em em a ni. Tuna inkhel avang khan inrintawkna ka neih belhchhah a, tlarhmaah awmin a ṭhiante a chawm bakah goal a khung bawk," tiin an player pawimawh a fak.

Hungary manager Bernd Storck chuan, "Hungary ram pumpui tan mumang ram ang mai a ni a, sawi tur pawh ka hre lo. Match hnih kan khelh tawhah kha chuan mipuiin min ṭawiawm ṭha em em a, amaherawhchu khang match hnih ai khan Portugal nena kan inkhelh ṭum hian ṭawiawmtu kan nei ṭha zawk," tiin an thlen chin chu lawmawm a tih thu a sawi.