Khawvel nghahhlelh India vs Pakistan

Pathianni zing dar 9:00 hian champion lai India-in ICC World Cup match hmasa berah Pakistan an hmachhawn dawn a, thla ruk liam ta khan minute 20 chhungin an hralh zo vek.

India leh Pakistan te hi Adelaide, Australia-ah an inkhel dawn a; zing dar 6:30-ah South Africa leh Zimbabwe te'n Seddon Park, New Zealand-ah an khel bawk ang.

Pakistan ngam loh India

India leh Pakistan te hi World Cup-ah India ṭum vawi nga an inhmachhawn tawh a, India an chak vek. Champion lai India hi ODI ranking-ah pahnihna an ni.

India squad-ah hian 2011 World Cup champion team zinga mi kha player pathum chiah an awm tawh a, chungte chu captain Mahendra Singh Dhoni, Virat Kohli leh Ravichandran Ashwin te an ni. Ashwin hi an champion ṭum khan squad-ah telh ni mahse, vawikhatmah a khel lo. India player-te hi an naupang tlang hle a, bowling lamah phei chuan World Cup-a India squad neih chhiat ber ang hial a ngaih an ni.

India hi World Cup hmachhawn tura an inbuatsaihnaah an che ṭha lo. Test series Australia nen an khel a, chak an nei lo. Carlton mid tri-series-ah England leh Australia te nen an khel a, vawikhatmah an chak zo lo bawk. World Cup warm up match-ah team tenau Afghanistan erawh chiang takin an hneh thung.

India hian Pakistan an hneh zo lo a nih ngat chuan India rama cricket thuneitu sang BCCI an mualpho ang. BCCI hian veteran Virender Sehwag, Zaheer Khan leh 2011 World Cup player of the tournament Yuvraj Singh te an ko lo a, player naupang zawkah rinna an nghat. Mualphona leh sawisel pumpelh turin batsman Virat Kohli, capatain MS Dhoni leh Rohit Sharma te an chet ṭhat a pawimawh dawn a ni.

Pakistan hian World Cup hmaa an warm up match-ah England leh Bangladesh an hneh a, inrintawkna nasa tak nen World Cup hi an hmachhawn ang. Cricket World Cup-a India an hneh theih loh tihtawpna hun ṭha chu tun hi a ni. Pakistan hi veteran player captain Misbah-ul-Haq, Younis Khan leh Shahid Afridi te'n an ho dawn avangin champion thei khawpin an ṭha a ni.

Khawvel hmuh chak chu

India leh Pakistan hi ram inhal tih sawi nawn a ngai lo. Cricket atchilh ram, cricket khawvela team ṭha ni pha pahnih inkhel hi khawvelin a hmu chak a ni.

Kum 2011 World Cup semifinal-a India leh Pakistan an in khelh ṭum khan khawvel puma inkhel entu zat chu maktaduai 988 an tling hial. Kumina India leh Pakistan inkhel hian a hma lama an inkhel entu zat hi a khum ngei rin a ni a, World Cup organiser-te chuan tluklehdingawn khat aia tam in an en an ring hial.

Cricket Australia chief executive James Sutherland chuan, "Cricket match khelh tawh zawng zawnga entu ngah ber a nih theih kan ring a ni," a ti.

Engnge an sawi?

2011 a India champion puitu coach Gary Kirsten chuan India chu World Cup champion tur khawpa an ṭhat thu a sawi a, chumi tur chuan Virat Kohli chet ṭhat a pawimawh thu a sawi tel bawk.

India player ropui ṭhin Sunil Gavaskar chuan, "Tunhnaia team pahnih te khelh dan en chuan chak zawk tur sawithiam a harsa a, Pakistan tan tun hi India hneh thei tura chance ṭhat ber ṭum a ni. Record hlui te kan en erawh chuan India hi chak tura dinhmun ṭha zawk chu an ni," a ti.

Pakistan coach Waqar Younis chuan, "India hi engtiklai pawn team tum harsa an ni a, kan ti mai mai lo ang. Kan rilruah kan hneh thei a ni tih dah chungin kan khel ang a, kan theihtawp kan chhuah ang," tiin a vawikhat nan World Cup-ah India hneh a tum hle.

South Africa vs Zimbabwe

South Africa hi ODI ranking-ah pathumna an ni mek a, Zimbabwe erawh 10-na an ni. Hei hian an dinhmun a thai lang chiang viau.

South Africa hi rinkai pawl ni ziah chungin World Cup-ah an la champion miah lo. An tawnsan ber ṭumin semifinal bak an la thleng lo. South Africa hi an captain AB de Villiers-a'n a rawn ho dawn a, an squad en chuan champion tura khawpa ṭha an ni.

Zimbabwe hi Cricket World Cup vawi 10 neih tawhah vawi riat an inlan thei a, an thlensan ber ṭumin super six ṭum hnih an inhlangkai tih loh chu record chhuan tur an nei lo. Amaherawhchu, ṭum dang zawng aiin kumin World Cup hi an squad rual khai ber ṭum nia sawi a ni a, South Africa tan zuam ngawt chi an ni bik lo ang.