Copa America Centenario Colombia hnehin Chile-in final lut

Ningani zing khan champion lai Chile chuan Copa America Centenario final lut turin ruah sur nasa tak hnuaiah Colombia chu 2-0 in an hneh a, Thawhṭanni zing dar 5:30-ah Argentina nen final an khel ang - 2014 final rematch kan hmu dawn.

Copa America kum 100-na neih ṭan dawn khan Chile hi champion tura rikai an ni phak meuh lo a, an group match hmasa bera Argentina 2-1 a an hneh loh nghal avangin beisei a sang lo. Mahse, a rei tawlh tawlh a, an thiam tual tual - quarterfinal leh semifinal-ah phei chuan an khingpui te an sawp.

Goal hnih a tawk

Soldier Field, Chicago-a inkhelah quarter­final-a Mexico 7-0 a an sawp ṭuma hrem tawk midfielder Arturo Vidal inlan thei lo mah se Chile tan buaina tur a awm lo. Minute sarihna lekah Jose Fuenzalida ball cross chu Colombia winger Juan Cuadrado-a'n anmahni lamah tauh pialin vengtu nei lo Charles Aranguiz chuan hnai set sawt aṭangin a pet lut.

Chile-in an duh tawk mai lo, minute 11-naa goalkeeper Claudio Bravo long ball pek dawngtu Alexis Sanchez chuan goal ban a pet per a, a per let lo dawngtu Fuenzalida-a'n a hlah lo. Arsenal keeper David Ospina tan an goal chhuah pahnihah tih theih a awm lo chiang hle.

Inkhelh laiin ruah sur vangin khelmual chhung­ah tui a tling hnem a, thli a thawt bakah khua a en ṭhat tawk loh avangin darkar hnih ngawtin second half an ṭan tlai phah. Colombia manager Jose Pekerman-a'n a naute fuihna hun ṭha nei tam mah se minute 57-naah mid­fielder Carlos Sanchez chu yellow card vawi hnih hmuh vanga hnawhchhuah niin beisei an nei tlem sawt.

2014 FIFA World Cup top scorer James Rodriguez-a'n danglamna a thlen thei tawh bik lo a, 2001 Copa America champion an nih hnuah Colombia hian he inelnaah hian final an la lut leh ta lo a ni.

Eng nge an sawi?

Chile coach Juan Antonio Pizzi chuan, "Hnehna kan chan chhan chu kan huaisen vang a ni a, tournament ṭan hma aṭang tawh khan kan rilruah hnehna chan duhna thinlung a awm tlat tawh. Inkhel zawng zawnga hnehna chan vek chu a theih loh a, mahse tuna kan khelh danah hian ka lungawi," tiin a nuate a fak hle.

Spain international hlui Pizzi chuan sawi chhunzawmin, "Darkar hnih chuang inkhel kan khawtlai kha a nuam lo hle a, mahse inkhel bak ngaihtuah kan neih loh avangin kan chiai phah lo. Second half-ah Bravo khan ṭum thum vel chu min chhanhim," tiin Colombia goal khung tur dangtu an keeper a fak tel.

Colombia head coach Jose Pekerman chuan, "A tira ṭum hnih kan tihsual kan tuar a, second half-ah erawh kan vanduai thung. Penalty kan hmuhna ngei turah kan hlawh chhuak zo lo a, kan player hnawhchhuah a ni bawk. Referee khan engtiang chiaha inkhel pawimawh nge a enkawl tih a hre lo emawni chu aw," tiin referee lakah a lungawi lo hle.

Pathumna

Colombia tan inelna a la tawp bik lo. Pathinni zing dar 5:30 hian a thlengtu United Sates nen University of Phoenix Stadium-ah pathumna dinhmun an inchuh ang. Ram pahnihte hi Group A-ah awm dunin Copa America Centenario match hmasa berah an lo inhmachhawn tawh a, Rodriguez leh Cristian Zapata te goal khung hmangin Colombia 2-0 in an chak.

US hian semifinal-ah Argentina 4-0 in an hneh lo a, anmahni rama inkhel an nih avangin pathumna tal nih an tum ang. Hetihlai hian Colombia tan hneh hnu hmachhawn leh hi a huphurhawm hranin a rinawm loh bawk, inkhel nghahhlelhawm tak tur chu a ni.