Arsenal hnawlin Leicester tan Vardy a rinawm

Arsenal-in lakluh tuma an hel mek Jamie Vardy chu Premier League champion Leicester City tan a rinawm zel dawn.

Foxes chuan season hmasaa league champion nihpuitu Vardy hian kum li daih contract an zawrh chu a pawm tih an sawi a, England international hian kar khatah £100,000 a hlawh ang.

Kum 29-a upa Vardy contract neih laiah hian pound maktaduai 20-a lei ngam an awm chuan an inbe thei ang tih a ni a, Euro 2016 khelh ṭan hma khan Gunners chuan kar khata £120,000 hlawh turin an thlem thlu hman ṭep nghe nghe. Mahse, tunah erawh sum tam tak aiin a lo hmingṭhat tawhna club-a hlawh tlem zawka cham a thlang ta zawk a ni.

Thuchhuah siamin Foxes chuan, "Leicester leh Vardy aiawh te chu contract pawh sei tur chungchangah kan inbe fel tawh a, Premier League champion tan hian a rinawm zia lan tir nan kum li daih contract a ziak ang," tiin kumin February thlaa kum thum daih contract an lo ziah thar pui tawh striker chungchang an sawi.

Vardy hian kum 2012 khan non-league club Fleetwood Town aṭangin £1m lekin Foxes hi a zawm a, a club hi Premier League-ah kaipuiin season hmasa khan goal 24 khungin a champion pui hial.

Kar hmasa khan Arsenal manager Arsene Wenger chuan Vardy hi season tharah King Power Stadium-ah a cham chhunzawm tur thu a lo sawi tawh. French manager hian Switzerland midfielder Granit Xhaka la lut tawh mah se a tlarhma ti chak turin player dang a melh a la ngai dawn niin a lang.