Germany hmaa ding tur Slovakia

Pathianni zan dar 9:30 hian Stade Pierre Mauroy-ah Germany leh Slovakia te an inkhel dawn. Euro 2016 ṭan hma khan ram pahnih hi friendly match-ah intawngin Marek Hamsik, Michal Duris leh Juraj Kucka te goal hmangin Germany hi an ramah 3-1 in an hneh a, Die Mannschaft tan Mario Gomez-a'n penalty aṭangin an khung ve bawk.

Slovakia tan Germany an khelh ṭuma goal khungtute hi Euro 2016-ah player pawimawh an ni vek a, Germany tana goal khungtu Gomez hian Northern Ireland an hneh ṭumin goal awmchhun a khung ve bawk. Friendly match-ah Slovakia chak mah se inelna takah erawh Joachim Low-a'n an ṭhat theih dan bera a naute a rem tawh dawn avangin Germany chu rinkai zawk an ni tawh ang.

Inelna lian thamah ram pahnih hi vawi kua an inhmachhawn tawh a, Germany hi vawi nga chakin Slovakia hi vawi khat chiah an la chak a, vawi thum dang erawh an inhnehtawk. European Championship bikah Germany tan Mario Gomez (goal 4) aia goal khung tam chu Jurgen Klinsmann (goal 5) chiah a awm tawh a, USA coach ni mek Klinsmann-a record hi khum theih a ni. Joachim Low-a'n Northern Ireland an khelh ṭuma a player-te tho Slovakia hmachhawn turin a hman a rinawm a, amaherawhchu Jerome Boateng erawh a chawn hliam vangin a dinhmun a chiang lo.

Slovakia lamah hming pakhat chauh lam tur ni se Hamsik aia lam hmasak tur an awm lo. Napoli midfielder hian Slovakia tana match hnuhnung paliah goal thum khungin assist vawi khat a nei bawk. Euro 2016 bikah Slovakia hian goal attempt vawi 26 an nei a, chung zinga 23-ah chuan Hamsik emaw Manchester City academy chhuak pahnih Vladmir Weiss leh Robert Mak te zinga pakhat tal an inrawlh.

Germany coach Joachim Low chuan, "Thomas Muller-a'n goal a khung loh avangin kan buai lo a, Slovakia nena kan inkhelh turah hian a khung ngei ka ring. Euro 2016 result hi thlir ila, team hrang hrang inhneh dan en hian inelna san zia leh kan intluk zia a lang," tiin eng team mah dahniam theih an nih loh thu a sawi.