Fiorentina tan Rossi a kir hnai

Fiorentina striker Giuseppe Rossi chuan inhliam vanga rei tak a chawlh hnuin inkhel tura a inpeih leh ṭep tawh thu a sawi.

Italian striker in­hliam ngun ve tak hian tunhnaiah training a zawm leh tawh a, an beisei aiin a dam chak.

Manchester United player hlui Rossi chuan, "Ka dam leh ṭan tawh a, training pawh ka zawm leh tawh a ni. Field chhunga inkhel tur chuan hun ka la duh rei deuh maithei a, chutihrualin ka hmasawn chak dan te enin ka lawm hle," a ti.

Season hmasa a goal 17 khungtu Rossi chuan, "Player talent ṭha tak tak awmkhawmna kan ni a. Kan player pawimawh Juan Cuadrado chhuak mah se Alessandro Diamanti leh Mohamed Salah te kan lakluh avangin kan buai phah lo ang," a ti bawk.

Rossi hian nikum May thla khan Torino nena 2-2 a an inhnehtawk ṭumin a inlhliam a, khami hnu khan Fiorentina tan a la inlan lo.

Table-a palinaa awm mek Fiorentina hian zanin dar 10:30 hian Sassuolo nen an inhmachhawn ang.