MPL Club Zo United an ṭang

Season hmasa Mizoram Premier League barakhaihtu Zo United chuan 'semi finalist' nih mai an tum tawh lo a, MPL5-ah team ṭha zawk din tumin ṭan an la.

MPL5 atana training ṭan hma ber an ni a, coach-ah tawnhriat ngah C. Lalrinsanga an ruai a, ani hi a vanglaia Mizoram fooballer lar a nih bakah coaching lamah pawh tawnhriat ngah, kum 2001-a Subroto Mukherjee Cup-a Mizoram an champion hmasak ber ṭuma coach a ni. Assistant coach-ah Vanlalrova an hmang dawn a, Tata Football Academy-a inzir chhuak, India aiawha lo khel fo tawh hian I League-ah pawh tawnhriat a ngah tawh a, MPL-ah pawh season hnih a inlan tawh bawk - coaching staff lam hi tawnhriat nei ṭha an ni.

Season hmasa khan player ṭha leh langsar sa an la a, an inseng hnem. Tun season-ah hian player thar chher chu thupuiah an nei a, MPL club-te tih zen zen loh trial koin player eng emaw zat an enchhin a, team-a lakluh pawh an nei nual ang. Heng player-te hian hun tam zawk training an neih theihna turin June thla tir aṭang khan training hi an ṭan tawh.

Player langsar pawh an la thar nual - Royal Wahingdoh aṭangin Malsawmtluanga, Tlangnuam leh Laldinmawia, Electric Veng-te an lalut a, an fit ṭhat chuan team tidanglamtu an ni thei ang. MPL4-a Luangmual FC winger goal thun thei tak Lalṭhazuala (Puitea), Zonuam an lalut a, hei bakah hian Mizoram senior team-a keeper pawh lo ni tawh
ṭhin Danny Lalrohlua an lalut thar a, MPL1-a RS Annexe winger ṭhin Lalhmangaiha, Electric Veng an ziak lut thar bawk.

Season hmasaa an player pawi-mawh winger Laldinliana Varte, defender Malsawma Chhangte, rawlthar duhawm Isak Vanlalpeka-te an la chelh thei a, team tana ṭangkai tur player an la zawng mek bawk.

MPL4-ah player langsar tak tak lalutin beiseina sang tak nen bul an ṭan a, beisei an phak lo. Tla thei dinhmuna an din hial hnuah season tawp lamah coaching staff an siksawi a, player an lak belh bawk a, MPL5-a an coach tur Rinsanga hnuai-ah harhtharna changin semi final an lut - champion ta Aizawl FC lakah an vanduai. MPL5-ah 'semi finalist' nih mai an tum tawh lo.

Zo United president Lalṭanpuia Rivung chuan, "Season thar chu kan phur khawp mai. Player ṭha leh langsar lak lam aiin a thar chher chhuah hi kan duh a, naupang leh tawnhriat nei kan inpawlh dawn a, kan coaching staff-te an phur bawka kan hlim khawp mai. Home Mission School nen thawhhona ziakin kan inrem tawh bawk," tiin a sawi.