Champion tum Barca leh tlak hlau Levante

Pathianni zan dar 9:30 hian Nou Camp-ah Barcelona-in tlak hlau Levante an mikhual dawn. Barcelona hian a zawna vawi nga an chak tawh avangin hmahruaitu Real Madrid nen point khat chauhin an inthlau tawh.

Team inang lo

Inkhel tur pahnihte hi an dinhmun a intlau hle. League game 22 khelh tawhah Barca hian point 53 an hmu tawh a, an khingpui tur Levante hian khelh zat inangah point 19 chauh an la hlawhchhuak thung a ni. An inthlahna hi point 31 zet a tling tawh.

Barca lam hian tlar hmaah superstar rual an nei a, Lionel Messi-a'n tun season-ah inelna hrang hrangah goal 34 zet khung tawh. Ani bakah hian Brazilian Neymar leh Liverpool aṭanga an Lak Luis Suarez an la nei bawk.

Valencia aṭanga an lakluh France international defender Jeremy Mathieu pawh an chhawr thei ang.

Barca hian Brazilian defender Dani Alves, Douglas Pereira leh Arsenal aṭanga an lakluh defender Thomas Vermaelen te an chhawr thei dawn lo. Levante lam hian inhliam vangin an player pawimawh paruk ngawt an chhawr thei dawn lo a, hei hi coach tan chuan luhaina tham a tling.

Pique a ṭawng chhuak

Spain international defender Gerard Pique chuan, "Messi leh coach inkarah inbakkaihna chu a lo awm tawh ngei a lawm, mah se hunin a liam pui tawh. Luis Enrique hi kan coach leh hotu a ni a team tan a pawimawh em em a ni. Leo pawh player pawimawh berte zinga mi a ni a, dressing room leh training boruak pawh a ṭha hle a ni." tiin a sawi.

Barcelona defender chuan sawi chhunzawmin, "Barcelona-ah hian ka hlim em em a, he hmunah hian ka football hun zawng zawng hman zawh ka duh a ni. Tun season tawpah emaw kum ruk hnuah pawh ni se hmundangah ka kal lo ang," tiin a club a cham zel a duh thu a sawi tel bawk.