India coach thar Anil Kumble

Board of Control for Cricket in India (BCCI) chuan India cricket team enkawl turin Indian bowler zinga hlawhtling bera chhal ngam Anil Kumble chu an ruat. Kum 45-a upa spin bowler hian a hna hmasa ber atan July khian test series khel turin India chu West Indies-ah a kalpui nghal ang.

Test match 132-a khelha wicket 619 la thei leh ODI match 271-a wicket 337 latu bowler tan India hi a coaching career inṭanna tur a ni dawn a, 'Jumbo' tia hminglem an vuahsak coach hian India team hi kum khat chhung a enkawl phawt ang.

India coach tur ngaih-tuahtu BCCI Cricket Advisory Committee (CAC)-ah 'The Fabulous Five' tih hminglem an phuahsak zinga mi Sachin Tendulkar, Sourav Ganguly leh VVS Laxman te an tel a, India junior team coach chu Rahul Dravid a ni bawk.

Fab Five zinga mi Kumble chuan, "Ram tana ka khelhpui ṭhin Sourav, Sachin, VVS leh Rahul te nena kan thawk ho leh thei tur hi ka lawm a, khelmual mai piah lamah pawn lam thlenga inkawmngeih em em kan ni," tiin a ṭhian hluite nen India cricket hmasawnna tura an thawk ho thei tur chu a lawm thu a sawi.