Gerrard-a'n Wembley a thleng ang em?

Tunkar tawpah Premier League a awm dawn lo a, FA Cup fifth round khelh a ni thung ang.

Zanin dar 11:00 hian Selhurst Park-ah Crystal Palace-in Liverpool an mikhual dawn a, a hmuhnawm ang. FA Cup-ah hian Premier League-a cheṭha Chelsea, Manchester City, Southampton leh Tottenham Hotspurs te an tla tawh.

Liverpool daltu Palace

Season liamta khan captain Steven Gerrard chetsual vangin Liverpool-in Chelsea an hneh lo a, champion nomawi an thlauh. Nomawi thlauh hnuah insiamṭhatna hun an nei a, nomawi an chhar leh dawn emaw tih hnuah Liverpool hian Crystal Palace lakah goal thum an veng him zo lo a, 3-3 an in draw. Kha result avang khan Premier League-ah Liverpool an la champion lo chhunzawm zel.

November thla khan Selhurst Park-ah Palace leh Liverpool te an inhmahchawn a, Palace 3-1 in an chak. Zanina an inkhelhna tur chu Selhurst Park a ni.

Harhtharna

Liverpool-in tun season Premier League match 12-naah Palace kha an hmachhawn a, season tir match 12-ah vawi li chiah an chak a, vawi ruk chak loin point 14 chauh an hlawhchhuak.

Liverpool hian season tir lamah 4-2-3-1 formation an hmang ṭhin a, tunah chuan 3-4-3 formation an hmang tawh. Formation thara an game hmasa berah Manchester United lakah tlawm mah se an khelh dan an bel hnuah erawh an game-ah hmasawnna hmuh tur a tam hle.

3-4-3 formation hmangin midfield an thunun a, tlar hnung a phui sawt a, an goal bawh a na zawk bawk. Liverpool-in season tir match 12-ah goal 21 an chhuah a, a hnuhnung match 13-ah goal 11 chiah an chhuah tawh. Match 12 leka tihsual vawi 17 zet nei khan match 13-ah vawi li chiah an nei tawh a, table-a 12-naa awm hma kha tunah chuan season thara Champions League khel pha thei tura zinga chhiar tel an ni leh tawh. Amaherawhchu zanina an khelh tur hi FA Cup a ni.

Gerrard Out

Liverpool-in Tottenham Hotspurs an hneh ṭuma inhliam captain Steven Gerrard an chhawr theih a rinawm lo a, season thara chhuak mai tur Gerrard-a'n Wembley Stadium thleng turin a teammate ṭanpuina a mamawh lehzual a. Captain bakah inhliam vangin Lucas Leiva a khel thei dawn lo a, Raheem Sterling dinhmun a chiang lo bawk.

Brendan Rodgers-a tana thu lawmawm chu Daniel Sturridge a dam tawh a, Mario Balotelli-a'n goal a khung leh tawh. Khualmuala khel tur ni mah se Liverpool hi rinkai zawk an ni.

Crytal Palace erawh dah hniam chi an ni lo. Manager Alan Pardew-a'n forward-ah Newcastle an hmachhawn ṭuma an siphurh sutna goal khungtu Fraizer Campbell bakah Marouane Chamakh, Yaya Sanogo leh Dwight Gayle te thlan tur a nei a. Amaherawhchu captain Mile Jedinak, Scott Dann, Lee Chung-yong leh Shola Ameobi te inhliam vangin a chhawr thei dawn lo thung.