Euro 2016. Spain hnehtu Croatia vs Ronaldo telna Portugal

Portugal-in Cristiano Ronal-do an nei a, amaherawh-chu European Championship-a champion lai Spain hnehtu Croatia hneh tur chuan Real Madrid forward theihna ringawta innghah chi a ni tawh lo.

Zanin dar 12:30 hian Stade Bollaert-Delelis, Lens-ah Croatia leh Portugal an inhmachhawn dawn a, tun Euro last 16 inkhel tur zingah chuan en châkawm berte zinga mi a ni.

Portugal 3-0 Croatia

Ram pahnih hi vawi thum an intawng tawh a, Portugal an la chak vek. Euro 96 khan group stage match hnuhnung berah Portugal hian Luis Figo, Joao Pinto leh Domingos te goal hmangin Croatia 3-0 in an hneh a, hei bakah hian friendly match-ah vawi hnih an hneh tawh bawk.

Hriat tel ngai erawh inelna pawimawha an intum ṭum hian ram pahnih hian quarterfinal an lut chiang ve ve tawh a, inkhel pawimawh tak a ni lo.

Perisic-a goal kha

Croatia-in an thiampuipa Luka Modric leh Mario Mand-zukic tel loin group match hnuhnung berah Spain an hmachhawn a, hun tawp dawna Ivan Perisic hmangin champion lai an hneh.

Inter Milan winger Peri-sic hi Euro 2014-ah player hmuhnawm a ni a, amaherawhchu a goal khung a lawmna lamah a jersey a phelh avangin Portugal nen an inkhelh huna yellow card a hmu a nih chuan quarterfinal-ah a inlan thei lo ang.

Kum 27-a upa Perisic bak-ah Milan Badelj, Marcelo Brozovic, Ivan Strinic, Doma-goj Vida, Marko Rog, Darijo Srna leh Sime Vrsaljko te pawh yellow card hmuh leh chuan hrem hmabak an ni. Portugal lamah erawh Pepe leh Ricardo Quaresma te chiah group stage-a yellow card hmu an awm thung. Yellow card pakhat chu quarterfinal zawh rualin nuai bo a ni ang.

Team Hmuhnawm

Croatia hian group stage-ah Turkey leh Spain an hneh a, heng inkhel pahnihah hian Luka Modric leh Ivan Perisic te chu man of the match a thlan an ni. Zanin hian inhliam vanga Spain hmachhawn thei lo Modric hi a la inlan theih hmel chuang lo a, striker Mario Mandzukic dinhmun a chiang lo bawk.

Croatia hian Czech Republic chiah an draw a, hemi ṭum hian Barcelona midfielder Ivan Rakitic chu khelṭha bera thlan a ni bawk.

Portugal hian group stage-ah chak an neih loh ang bawkin chak loh an nei lo. Fernando Santos hote hian match tinah point khat chauh hlawh chhuak zel mah se Iceland (Nani), Austria (Joao Moutinho) leh Hungary (Cristiano Ronaldo) an khelh ṭumin man of the match an hauh vek.

Ronaldo leh Nani

Portugal tan captain Ronaldo a inlar ṭan a, Hungary lama a goal hnih vangin knockout stage an thleng. Real Madrid star hian theihna sang tak nei mah se major tournament-a freekick vawi 40 a pet tawhah a la la pet goal lo.

Ronaldo hi Manchester United tana a khelhpui ṭhin Nani nen Portugal tan an pawi-mawh a, Fernando Santos hote goal hnuhnung pasarih hi player pahnih khung hi a ni.

Chutihrualin Portugal hi Ronaldo ringawta innghat chu an ni bik lo. Nikum khan UEFA U21 inelnaah pahnihna an ni a, chumi ṭuma best player William Carvalho bakah Joao Mario leh Borussia Dortmund lak thar Raphael Guerreiro te chu tun ṭumah hian player pawimawh an ni pha a, Bayern Munich lak thar midfielder Renato Sanches leh Valencia midfielder Andre Gomes te'n hmabak an nei eng viau bawk.

Eng nge an sawi?

Croatia coach Ante Cacic chuan, "Knockout stage chinah chuan khingpui awlsam an awm tawh lo a, keini hian a harsa ber kan tawng a ni. Amaherawhchu group harsa ber aṭangin hmahruaitu kan ni a, inrintawkna kan mamawh ang chu ka nei e. Portugal hi zah tho mah ila kan theihna kan hria a, chona thar hmachhawn hi kan châk tawh a ni," tiin a sawi.

Portugal captain Cristiano Ronaldo chuan, "Team ṭha tak kan kan tum dawn. a, tun dinhmunah chuan 50-50 niin a khelṭha zawk zawk an chak ang. Team zawng zawng tan Spain hi hneh theih a ni lo a, ani hi Spain hneh theitu an nih avangin theihna a nei sang a ni," tiin an khingpuite a fak.