FA-in Chelsea leh Everton an hrem

Football Association chuan Chelsea leh Everton te chu an player te an thunun zawh loh avangin an hrem.

Nilaini Premier League inkhelah Chelsea leh Everton te Stamford bridge-ah an inhmachhawn a, hun tawp dawn hnaiah Everton midfiel­der Gareth Barry-a'n Chelsea forward Willian laka a foul vangin hnawhchhuah a ni a, buaina tenau a chhuak zui bawk.

Buainaa thuk taka inrawlh Chelsea defender Branislav Ivanovic erawhin hremna a pumpelh. Serbia defender hian minute 86-naah Everton midfielder James McCarthy chu a nghawngah rekin a kuai bet a, field chhungah hremna a pumpelh hnuah replay hmangin ennawn a niin hrem a ni chuang lo.

Inkhelh banah Toffees boss Roberto Martinez chuan, "Ivanovic a khawsazia kha a zahpuiawm hle. Mc Carthy nghawngah khan na takin a lam hawi zawngin a kuai bet a, hnawhchhuah tur a ni," tiin a lo sawi tawh.

Everton ngaihdan leh FA ngaihdan a inlang lo. FA thuchhuak chuan, "FA danah chuan referee-in thil thleng kha a lo hmu fuh lo a nih chuan member pathum awmna panel-in an ngaihtuah nawn leh a, hrem ngai chu an hrem mai ṭhin. Ivanovic chungchang bikah hi chuan hremna tur an hmu lo a ni," a ti.

FA-in Everton leh Chel­sea te a hrem dan tak hi thai lan a ni lo a, club pahnihte hian an duh chuan hremna hi February 17 thleng an khinglet thei ang.