Swiss nge Poland thleng thui zawk ang?

Euro 2016 khelh mekah Switzerland leh Poland ten an ram football chanchina bung thar an ziak mek - Ram pahnihte hian zanin dar 6:30 hian Geoffroy Guichard-ah last 16 match an khel dawn a, a hmuhnawm ang.

Football ram ropui tia sawi tur ni lo mah se Switzerland leh Poland te tun hnaiah an khel ṭha a, an ram chanchiana vawi khat nan European Championship-ah knockout round an lut hial; zanin hian ram pakhat zawk zinkawng a tawp dawn rualin ram pakhat zawk erawhin history an siam belh zel dawn.

Kum 1976 khan Switzerland hian an khawpui pakhat Basel-ah Poland hi friendly match khelhpuiin 2-1 in an lo hneh tawh a, hei bak hi a chak zawkah an ṭang leh tawh ngai lo. Poland erawhin Switzerland lakah vawi li hnehna chang tawhin an intawn ṭum ngaah erawh an inhnehtawk thung.

Switzerland hian player hrem tuar leh inhliam an neih loh avangin an ṭhat theih dan berin an inlan thei dawn. Hetihlai hian Poland erawh Ukraine 1-0 a an hneh ṭuma malpui na goal-keeper Wojciech Szczesny a la inlan theih a rinawm loh a, ani aiah hian Arsenal keeper hlui Lukasz Fabianski hmel kan hmuin a rinawm.

Poland captain Robert Lewandowski-a'n beisei angin la khel chhuak thei lo mah se qualifying-a goal 13 khung thei Bayern Munich striker hi ven ngun ngai ber a ni dawn tho. Poland hian Northern Ireland leh Ukraine te an hneh bakah Germany nen 0-0 a inhnehtawkin Group D-ah pahnihna an ni thei a, quarterfinal lut turin theihna an nei.

Switzerland inngahna tur chu Granit Xhaka a ni leh ngei dawn. Arsenal midfielder thar hi group stage-ah chuan player langsar ber pawl a ni a, a ball pass dik dan chu 89% zet niin match khatah vawi 105 zel pass nei ang a ni rih a, Poland chhaih buai turin a ṭha tawk em tih erawh a la sawi lawk theih loh thung.