Assen GP atan Rossi a inpeih

Tun season-a Moto GP intlansiak pariatna tur Netherlands Grand Prix (Assen) chu Pathianni hian tlan a ni dawn a, he hun atan hian Valentino Rossi chuan a inpeih tawh thu a sawi.

Season hmasa khan Rossi hi champion thei dinhmunah ding hman mah se kum tawp lamah a teammate Jorge Lorenzo a tluk lo a, kuminah point 103 hmu tawhin championship hmahruaitu Marc Marquez (125) leh Lorenzo (115) te nen an inel tawk hle.

Intlansiak hmabak thlirin Rossi chuan, "Barcelona-a intlansiak kan neih hnuah chawlh kan nei leh vang vang tawh a, tunah chuan inelna hmachhawn a chakawm leh tawh hle. Assen hi ka hmun ngainat a ni a, kum tinin he hmuna intlansiak tur hi rinthiam a harsain boruak a nuam ṭhin hle," tiin a sawi.

Kum 37-a upa Rossi hian season hmasa khan Assen-ah hian Marquez leh Lorenzo te hnehin pakhatna dinhmun a luah nghe nghe.

Yamaha rider Rossi chuan kum dang aia a harsat zawk a rin thu sawi chhunzawmin, "Nikum khan intlansiak hnuhnung ber thlengin pakhatna dinhmun kan inchuh a, a nuam hle. Kuminah pawh hian khatiang deuh kha a nih leh ka ring a, kha aimah khan a nuamin a hautak zawk ang. A chhan chu intlansiak tam takah kei aiin Marc leh Lorenzo an tlanchak zawk ṭhin vang a ni," tiin a sawi.