Laurent Blanc-a'n PSG chhuahsan ta

Ligue 1 champion Paris St Germain coach Laurent Blanc chuan a hna a kal san ta - he thu hi PSG lam chuan la puang chiah lo mah se French sport chanchin bu lar L'Equipe chuan an tarlang chiang tawh.

Kum 50-a upa Blanc hian tun hnai saeson hnih chhungin Ligue 1 title, French Cup leh League Cup-ah te PSG hi a champion pui vek. Mahse, club president Nasser al Khelaifi chuan thla hmasa khan, "Tun season chu kan hlawhchham," tiin a lo sawi tawh.

A zawnin treble champion ni thei mah se Champions League-ah an hlawhltin miau loh avangin player ṭha lei nana sum hmang hnem club thuneitu lam an lungawi lo a ni.

France defender hlui Blanc hian 1998 khan Les Bleus chu World Cup-ah a lo champion pui tawh a, inkhelh a chawlhsan hnuah team enkawl hna thawk zuiin kum 2013 khan Carlo Ancelotti thlakin PSG hi a enkawl ṭan.

Kumin February thla khan kum hnih daih contract thar ziak lehin hun rei zawk a cham chhunzawm tura ngaih a ni. Mahse, club hruaitute hian Sevilla coach hlui Unai Emery an hmu tai ta zawk niin a lang. PSG hian Blanc hnehnah hian zângnadawm nan pound maktaduai 17.60 an pek a ngai thung a ni.