Contract thar a pawimawh - Deschamps

Didier Deschamps chuan a contract neih lai a pawtsei a, World Cup 2018 thleng France national team a enkawl ang.

Deschamps chuan, "Contract thar hian thuneihna leh mawhphurhna a rawn keng tel a, chu chu team tan a ṭha a ni. Inelna lian tham (World Cup) zawha enkawltu ngai awm hi a ṭha a ni. Game kalphung nghet neih hi a ṭha a, coaching staff dangte nen result ṭha kan neih theihna turin theihtawp kan chhuah ang," tiin a sawi.

1998 World Cup-a France champion puitu captain chuan, "France hi kum 10 pawh enkawl ka duh a, amaherawhchu ka hma lam hun chu result a zir a ni ang. Tun dinhmunah chuan ka hnaah hian ka lungawi hle a ni," tiin a sawi.

Manchester City midfielder Samir Nasri erawh France boss chungah hian a la thinrim reng. Nasri chuan, "World Cup ka khel lo kha ka hun tawn hreawm ber a ni. Deschamps khan koh ka phu reng laiin min thlang duh lo a, ka theihngilh tawh lo ang," tiin a lungawi loh thu a sawi a. France tana kir leh a tum loh thu a sawi tel bawk.

European Championship 2012 zawh khan France coach Laurent Blanc a bang a, Deschamps hian July 2012-ah France enkawl hna hi a ṭan. 2014 World Cup-ah France-in quarterfinal an thleng a, Germany hneh loin an tla.