National Games-ah Mizo nula an vul Taekwondo-ah silver pakhat leh bronze pathum an la

National Games 2015, Kerala-a neih mekah Mizo hming a ṭha zel. Khawzawl nula Lalchhanhimi'n Weightlifting-ah Mizoram tan silver medal a lak hnuah Mizoram Football team in gold medal an la a, a tawpna a la ni lo. Nimin khan Mizo nula te'n Taekwondo-ah silver pakhat leh bronze medal pathum an la leh bawk.

Mizoram Amateur Taekwondo Association hmingin National Games a khel tur hian hmeichhia pariat an fehchhuak a, medal pali an hawn thei.

Kaplianzawni'n a kap lian!

Aizawl Ramthar Veng tleirawl kum 15-a upa Kaplianzawni-i'n senior level-a a vawi khat zin chhuahnaah medal a la nghal a, Mizoram tan bronze medal a hlawh chhuak.

Maliani hian Ningani khan Maharashtra lam chhuak Abogli Jagtap chu a match hmasa berah 8-5 in a hneh a, semifinal-ah erawh Jharkhand lam mi Priti Kumari chu inbei tawk tak chungin 7-10 in a hneh zo lo - bronze medal-ah a lungawi a ṭul ta a ni.

Ropeka fanu Maliani hi sub-junior aṭangin senior level-ah a khel nghal a, kum 15 leka upa nichunga bronze a la thei hi a chhuanawm hle. Sub junior leh state level-ah medal a la nual tawh a, a khelhna hi kg 46 hnuailam a ni.

Ngaihawmi pathumna

Kum 20-a upa Lalngaihawmi, Thenzawl, Ramthar Veng nula hian a khelh hmasak berah 17-5 in Jharkhand aiawh Alice Bara a sawisa a, semi final-ah erawh Madhya Pradesh lam chhuak Rekha Devi chu 8-13 in a hneh zo ta lo a, bronze medal a dawng ta a ni.

K Lalmuanpuia fanu Lalngaihawmi hian junior level-ah Mizoram tan gold medal leh bronze pakhat a la tawh. National level-ah Mizoram tan a vawi thum fehchhuahna a ni a, kg 57 leh 67 inkarah a khel a ni.

Muansangi a thleng sang

Khawzawl lam chhuak F. Lal­muansangi hian kg 53-57 weight inkarah a khel a, Bronze medal a la.

Kum 21-a upa Lalmuansangi hian state level-ah chuan medal a lo la nual tawh a, kum 2012 khan National Taekwondo Championship, Manipur a khelhah Mizoram aiawhin bronze medal a lo la tawh bawk.

F. Thianghlima fanu Muansangi hian a khelh hmasak berah Haryana aiawh Vandna chu 19-7 in a sawp a, semi final-ah erawh Manipur nula Y Shantibala Devi hneh zo loin 4-1 in a tlawm a, bronze medal a la ta a ni.

Rempuii a pui

Kg 53-57 inkar weight-a Mizoram tana bronze medal latu F Lalmuansangi nau Lalrempuii hi Kg 62 -68 inkarah a khel a, Mizoram tan silver medal a la.

Khawzawl nula Lalrempuii hian round khatnaah ṭhenawm state Manipur aiawhtu M. Sarjubala Devi chu 10-5 in a hneh a, semifinal-ah Madhya Pradesh nula Priya chu 4-2 a hnehin, final-ah erawh a thlengtu Kerala nula Reshma chu 4-13 in a hneh zo ta lo a ni.

Lalrempuii hian Mizo hming vawi tam a lo tiṭha tawh ṭhin a, Senior Level National Taekwondo Championship-ah gold medal pathum a la tawh a, junior-ah silver medal a la tawh bawk.

Kum 20-a upa Rempuii hian Co­mmonwealth Taekwondo Champion­ship 2011, Chennai khawpuia neihah silver medal a lo la tawh bawk.

Lawmna karah rualawhna

Mizoram coach PC Lalbiakmawia chuan, "Kan player-te hi a tam zawk chu senior level-a la khel ngai miah lote an ni hlawm a, state dang player-te hi chu international thlenga lo thleng sang tawhte an ni thung. Kan dinhmun ngaihtuahin hetiang zat medal kan la thei hi kan lawm hle. Practice-na ringawtah pawh hmanrua kan neihte a inthlau em em a; inbuatsaihna atana an dawn ang zawng zawng hi dawng ve thei ngat ila chuan hei ai hian kan thleng sang ang," a ti.

Silver medal latu Lalrempuii chuan, "Electronic safeguard leh electronic headgear vek kan hmang a, Mizoram lamah kan nei pha si lo. Kan vawi khat hmannaah national level competition kan hmachhawnpui nghal a ni a, kan duh angin kan khel ṭha thei lo a ni," a tiin hmanraw neih ṭhat tawk loh chu an chak loh chhan niin a sawi.

Mizoram tana medal rawn hawntu Mizo nulate chuan, intihsiakna sang National Games an khel chu an hlawkpui takzet thu Vanglaini an hrilh bawk.