Euro 2016 Hungary tan fiahna hautak, Belgium an hmachhawn dawn

Euro 2016-a beisei phak baka che ṭha Hungary-in zanin-ah fiahna hautak an hmachhawn dawn - Portugal laka goal hnih khungtu captain Balazs Dzsudzsak hoa khel Hungary hian Pathianni zan dar 12:30-ah champion tura rinkai zinga mi Belgium nen last 16 match an khel ang.

Belgium-in squad an neih
ṭhat zia hi sawi nawn ngai ni lo mah se Hungary-in an hlau lo. Portugal nen an inhnehtawk ṭuma khel ṭha tak right back Barnabas Bese chuan, "Match kan khelh apiangin inrintawkna kan neih belh zel a, eng team pawh kan hmaah ding dawn se hlauh kan nei lo," tiin Belgium hmachhawn tura an inpeih thu a sawi - Pathianni zanah an inpeih tak tak leh tak tak loh a chiang dawn.

Beisei loh Hungary

Tun hmaa football ram ropui ni ṭhin Hungary hi rei tak football khawvela an reh hnuah kum 44 hnua a vawi khat nan Euro khel turin an inpet tling leh a, group F-ah Portugal, Iceland leh Austria nen an awmho dawn tih hriat a nih khan group hmahruaitu nichunga last 16 an luh ringtu an awm kher lo ang.

Mahse, Hungary-in khaw-vel barakhaihin an match hmasa berah Austria (2-0) an hneh nghal a, Iceland (1-1) leh Portugal (3-3) inhnehtawkpuiin hmahruaitu an ni - Hungary player-te huaisennain fak a hlawh a, an thawhrimna hmuh hmaih theih a ni lo bawk.

Belgium erawh tournament ṭan hma hauha champion tura rinkai zinga mi an ni. An match hmasa berah Italy (2-0) hneh lo nghal mah se Republic of Ireland (3-0) Sweden (1-0) te an hneh a, an phur vanglai tak a ni.

Hriat ngai loh Hungary

Belgium-in last 16 an luh theih nan hun tawp dawnah Radja Nainggolan chuan Sweden lamah goal ropui a khung a, he goal ropui khungtu Roma midfielder hian Hungary player zingah hriat a lawi a neih loh thu a sawi chhuak!

Chelsea nena sawizawm hlawh mek midfielder chuan, "Dik taka sawi chuan Hungary-ah hian hriat mumal ka nei lo. Kan tana pawimawh ber erawh kan theihna zawng zawng nena khelh a ni a, kan duh dan taka kan khel chhuak thei a nih chuan hnehna kan chang ang," tiin chak tura khingpui player hriatchian kher a ṭulna a awm loh thu a sawi.

Belgium midfielder Mousa Dembele chuan a kerekah hliam a tawrh avangin training a zawm thei lo a, Tottenham Hotspur midfielder hi amaha training neih tir a ni. Zaninah a inlan theih dawn leh dawn loh a chiang lo.

Team pahnih

Tun hmain Hungary leh Belgium hi vawi nga chiah an la inhmachhawn a, Belgium an chungnung zawk - vawi li hnehna changin vawi khat an inhnehtawk. Euro-ah erawh Hungary an khelh ṭhat miau avangin Belgium tan an record chhawm nung turin theihtawp chhuah a ṭul ang.

Tlarhmaah Belgium-in player nei ṭha zawk mah se goal khung hnem zawk chu Hungary an ni. Bernd Storck-a kaihhruai team hian match thum an khelh tawhah goal thum an khung a, goal khung tuma an shot neih zat hi vawi 37 niin heng zinga 17 hi target-ah a kal thei.

Belgium-in shot vawi 59 tehmeuh an neihah goal li chiah an khung a, heng zinga ball 17 chu target zawna kal a ni - statistics aṭanga en chuan goal hmaah Belgium aiin Hungary an hriam zawk a, an finsihing a ṭha zawk tihna a ni.

En bik tur

Hungary tan captain Balazs Dzsudzsak bawk hi innghahna a ni leh ngeiin a rinawm. Turkish club Bursaspor winger hian free kick pet a thiam a, Belgium tan goal hnaih lama free kick chawi loh a finthlak ang.

Belgium tan tlarhmaah Ro-melu Lukaku chu an innghahna a ni a, Everton striker hian match thumah goal hnih a khung tawh. Lukaku thlawp turin Kevin De Bruyne a awm bawk avangin Cristiano Ronaldo dang thei lotu Hungary tlarhnung tan fimkhur a ṭul dawn.