Gold Medal awrh chungin vawiinah Mizoram football team lo haw dawn

Lengpui Airport-ah 'champion sawhchiar' nen, Lammualah 'champion choclate' nen Mizo mipuite'n National Games football-a gold medal dawngtu Mizoram Football Team vawiin hian an hmuak dawn.

Lengpui Airport

Vawiin hian National Games-a pakhatna Mizoram football player-te chuan Mizoram an lo lut dawn. Mizoram team-te hi Lengpui Airport-ah hmuah an ni phawt ang a, hetah hian mi 700-800 vel ei tur 'champion sawhchiar' nen hmuah an ni ang!

Lengpui Airport-ah hian chhun dar 12:00-ah player thleng hmasate chu lo ṭum tawh tura beisei an ni a, airport kal tumte tan dar 12:00-a thleng hman tura kal a finthlak ang.

Lengpui khawtlang an phûr a, an khaw pa Rohmingthanga telna team a nih vangin he football âtchuilh khua hi a khaw nawta Airport-a kal an tum.

Kalkawng leh Lammual

Player-te an thlen kim hnuah Aizawl pana kawngzawh tur a ni a, lirthei eng chi pawh a neiin ken theih a ni ang.

Hunthar Vengah player-te hi an chuanna tura buatsaih lirtheiah chuangin Aizawl khawpui fan a ni ang a, ruahman dan chuan Sikulpuikawnah kualin Lammualah luh tur a ni ang.

Lammualah hian tlai dar 4:00-ah 'gold medal lawmna' ṭan tur a ni a, zaithiam chi hrang hrangte'n an lo lawm dawn a, CYMA lama lam thiam rualte'n an lo hmuak bawk ang.

Lammuala kalte hi an zavaiin 'champion choclate' pek ṭheuh tum a ni bawk a, Valentine's Day-ah Mizoram Football Team-in anmahni ṭantu Mizo mipuite choclate an pe ṭheuh dawn a ni.

Active Sound-in an sound system lian an thawhchhuahpui dawn a, zai thiam langsar tak tak hlir an inlan dawn a, a tawpah champion lawma lamna hun tur pawh siam a ni ang.

Mizoram team official jersey siam­tu Rin Rin chuan Lengpui Airport leh Lammual chhehvelah Mizoram jersey lei theihin an pho chhuak dawn a ni.

Mizoram Football Association chuan Mizoram Football Team lawmna hun a buatsaihah hian Weightlifting-a silver medal dawngtu Lalchhanhimi, Khawzawl lawmpuina thilpek a hlan bawk dawn a ni.