Ireland tan France laka phuba lakna hun

Kum 2009 a ni a, Republic of Ireland leh France ten Stade de France, Paris khawpuiah World Cup playoff an khel. Inkhel pahnih belhkhawmah team pahnih hi 1-1 a an inhnehtawk avangin extra time khelh a ngai a, hun tawp nan minute 17 chiah a awm tawh tihin Irish mipuite rilru tinatu thil a thleng.

France striker ropui Thierry Henry chuan a kut hmangin William Gallas-a goal khung tur a siamsak a, referee-in goal-ah a pawm miau avangin World Cup khel turin France an tling - inkhelh zawhah Henry-a'n ngaihdam a dil a, Irish mipui rilru na a thawi dam zo tawh chuang lo.

Pathianni zan dar 6:30-ah France leh Ireland-in Euro 2016 last 16 an khel dawn - kum sarih chhunga an rilru hliam tidam turin Ireland-in phuba lakna remchang an nei a, Irish mipui rilru na thawidama France mipui vel ṭap turin Ireland player-ten theihtawp an chhuah dawn.

Team pahnih hi tun hmain vawi 16 an lo inhmachhawn tawh a, vawi nga chu chak zawk awm loa inṭhenin France-in vawi sarih hnehna an chang a, Ireland-in vawi li hnehna an chang thung - zaninah pawh an inngam tawk khawp ang.

'Party' ang aw!

Ireland-in Group E-ah pathum-na nichungin last 16 an lut a, Sweden (1-1) inhnehtawkpuiin Belgium (3-0) an hneh lo a, an match hnuhnung berah Italy (1-0) chu beisei loh takin an hneh a, last 16 an lut.

France chanchinbu lar L'Equi--pe chuan Ireland-in Italy an hneh tukah an chanchinbu phek hnih khat vekin Ireland hneh-na chan thu an ziak a, Irish team huaisenna leh inpekna fakin 'vawi khat chu party leh ang aw' tiin headline an ziak - Italy an hneh dan enin Ireland hian France hi an 'party' khum lo ang tih a sawi theih loh!

Euro thlengtu France-in Group A hmahruaitu nichungin last 16 an lut a, champion tuma an zinkawngah hian Romania (2-1), Albania (2-0) te hnehin Switzerland (0-0) nen an inhneh-tawk a, Pathianni zan hi tun tour-na-ment-a fiahna hautak an hma-chhawn hmasak ber tura chhiar theih a ni.

Inlan tur

Kum 2009 World Cup play-off a France leh Ireland inhma-chhawn ṭuma player inlan zingah Glenn Whelan, John O'Shea, Aiden McGeady, Robbie Keane leh Shay Given te Ireland squad-ah an la awm a, France player zingah Patrice Evra, Bacary Sagna, Hugo Lloris, Andre-Pierre Gignac, Moussa Sissoko leh Steve Mandanda te an la awm bawk.

Ireland coach Martin O'Neill-a'n a player zingah full back Stephen Ward, striker Jon Walters leh winger James McClean ten hliam an tawrh vek thu a sawi a, France hmachhawn turin Burnley defender Stephen leh West Brom winger Mc Clean-te erawh an dam hman beisei a ni.

Martin O'Neill-a'n Italy an hneh hnuah a naute chu ni khat chhung chawlh hahdamna hun a pe a, nimin khan an inkhelhna tur hmun Lyon khawpui thleng khawmin ruahman lawk aia nikhatah an thleng hma - Ireland hian tih mai mai an tum lo tih a chiang.

Group stage-ah France coach Didier Deschamps-a'n a naute a siksawi nasa a, hei hi French legend Henry chuan hrethiam loin an ram chuan an ṭhat dan ber hre loa last 16 an luh thu a sawi!

Deschamps-a'n training a kalpui dan thlirin Romania an hmachhawn ṭuma a starting eleven a hman beisei a ni. Hetiang a nih chuan France hian 4-3-3 formation hmangin tlarhmaah Antoine Griezmann, Olivier Giroud leh Dimitri Payet te an chhawr leh dawn tihna a ni a, midfield-ah Paul Pogba, N'Golo Kante leh Blaise Matuidi te an inkawp ang - lehkha aṭanga en chuan Ireland hna a hautak zawk dawn niin a lang.