Olympic-ah LeBron James inlan dawn lo

2016 NBA champion Cleve-land Cavaliers star LeBron James chuan August thla a neih tur Rio Olympic-ah a inlan loh tur thu a sawi.

Kum 31-a upa James hian Olympic hnuhnung pahnih Beijing leh London-ah khan United States chu gold medal a lak pui a, Brazil-ah pawh hian an ram innghahna tur ber ni mah se chawlh hahdam a duh rih ta zawk a ni.

NBA Most Valuable Player vawi li ni tawh James chuan zawhna chhangin, "Tunah chuan chawlh ka duh rih," tiin Olympic khelh ai chuan season thar nghah nana a taksa hahdam tir a thlan zawk thu a sawi.

American power forward James hian an ram basketball tan a thawhhlawk tawh ṭhin hle a, point 273 score sak tawhin ani aia score hnem an awm loh bakah rebound vawi 95 la tawh bawkin pahnihna dinhmun chelh mektu a ni.

James bakah hian Golden State Warriors star Steph Curry, Russell Westbrook, Chris Paul leh James Harden te pawhin Olympic an khelh loh tur thu an lo sawi tawh bawk.