Wales leh N.Ireland an inringtawk

Euro 2016-ah a vawi hnih nan British Derby kan hmu leh dawn a, tun ṭumah erawh group stage niloin last 16-ah a ni.

Zanin dar 9:30 hian group stage-a England hneh lotu Wales leh Northern Ireland an inhmachhawn dawn - team pahnihin champion nomawi an beisei thu an sawi ve ve a, zaninah team pakhat zawk zinkawng a tawp dawn.

Zinkawng

Northern Ireland-in group stage-ah match thum khelin Poland (1-0) Germany (1-0) an hneh lo a, Ukraine (2-0) lakah hnehna chang thungin pathumna an ni a, group paruka pathumna zinga a ti ṭha paliah an tel avangin last 16 an lut.

Wales-in group B-ah hmahruaitu nichungin last-16 an lut a, England (2-1) lakah hnehna chang zo lo mah se Slovakia (2-1) leh Russia (3-0) an hneh - team pahnih an inhmachhawn tawh vawi riatah Northern Ireland-in hnehna an la chan ve miah loh avangin zaninah an record duhawm lo thai chhiat an tum ang.

Team pahnih hian major tournament-ah tawnhriat an la nei ropui lo dun hle. Northern Ireland tan kum 1958 World Cup-a quarterfinal an luh hnua knockout stage an luh lehna hmasa ber a ni a, hemi kum vek hian Wales pawhin quarterfinal an thleng a, team pahnih tan zanin an inkhel tur hi inelna lianthama knockout stage an luh lehna hmasa ber a ni.

Champion tum Bale

Gareth Bale-a'n Euro 2016 quali-fying-ah goal sarih a khung a, Euro-ah match thum khelin goal thum a khung leh tawh. Real Madrid forward chuan, "He inelnaah hian tum pakhat neiin kan lokal a, chu chu nomawi chawi a ni - match thum khelh zawha duhtawka haw mai tur kan ni lo," tiin champion an tum ngam thu a sawi.

Kum 26-a upa forward chuan sawi chhunzawmin, "Kan hmaa ding apiang hneh zel kan duh a, nomawi chawi kan chak a ni. Tunah erawh kan rilru zawng zawng hi Northern Ireland-ah kan pe a, match khat zela ke pen kan duh a ni," a ti.

Mahse, Bale-a'n Northern Ireland hneh a awlsam dawn lo tih hriain, "Quali-fying group-ah hmahruaitu nichungin Euro an inpetkai a, vanneih vanga khel an ni lo tih a chiang a ni. Keimahni ang thoa team inlungrual an ni a, an tlarhnung an remkhawm ṭhat avangin suttlang a harsa dawn," tiin an hmabak a khirh thu a sawi.

Lafferty a zam lo

Northern Ireland-in Euro an khelh theih nana player thawhhlawk ber chu Kyle Lafferty tih ngam a ni. Norwich City striker hian qualifying-ah goal sarih a khung a, France-ah erawh goal a la khung miah lo thung.

Season hman zawh taka Birmingham City-a loan-a khel Lafferty chuan, "Kan tumna leh theihna avangin eng team pawh hneh thei turin kan ṭha tawk tih hi kan rilru zawng zawngin kan pawm a ni. Kan squad neih dan thlir chuan kawng thui tak kan kal thei tih a chiang a ni," tiin a zam lo hle.

Lafferty chuan Gareth Bale chung-chang sawi chhunzawmin, "Bale danchah hi thil harsa tak a ni dawn a, an team tan a thawhhlawk em em a ni. Mahse, fimkhur takin an chakna leh chak lohna lai kan en ang a, a tawpah chuan kan dinchan zawk ka beisei," tiin Wales an hneh theih a inring.

Euro 2016 group stage statistics
aṭanga en chuan N.Ireland keeper Michael McGovern aia ṭha an awm lo. Lafferty chuan Gareth Bale-a'n goal a la khung ziah chhan chu an keeper anga ṭha a la hmachhawn loh vang a nih thu a sawi!