Copa America Centenario Final Argentina leh Chile ten ropui ber nih inchuh dawn
"Champion nomawi in chawi thei lo a nih chuan lo haw suh u," tiih kum 1986 World Cup-a Argentina champion puitu Diego Maradona chuan an ram player-te thu a thawn. He thu hian Argentina chu nomawi chakin an tui hal mek tih a lan chian tir viau.
Goal ropui bik, beisei loh result, inkhel hmuhnawm leh hautak tak tak kan hmuh hnuah Copa America Centenario hmawr bawk a ni dawn - Thawhṭanni zing dar 5:30 hian MetLife Stadium, East Rutherford-ah final khelh a ni ang.
Ram leh ram football hmang-a inelna zinga upa ber Copa America hi kum 1916 khan khelh ṭan niin kumin hi a kum 100-na (Centenary) chiah a ni a; CONMEBOL (South American football confederation) leh CONCACAF (Football confe-deration for North and Central America and the Caribbean)
aṭangin ram 16 ten United States-ah inelna an nei.
World champion vawi nga ni tawh Brazil leh Copa America champion ngun ber Uruguay (15) ten group stage pawh an paltlang zawh lohna tournament-a a sang pahnih Argentina leh Chile te inkhel tur hi engti zawng pawha sawi nep theih a ni lo.
Messi hoin...
'Lionel Messi' - he hming chauh pawh hi thlamuanpui tham a nih laiin an khingpui turte tan chuan mut ti tui lo tham a ni thung. Argentina hian an captain bakah hian tlarhmaah quarterfinal leh semifinal-a goal li khung thei Gonzalo Higuain an nei a, Angel Di Maria a la khel thei lo a nih pawhin Sergio Aguero leh Erik Lamela te hi an rintlak bawk.
Copa America champion vawi 14 ni tawh Argentina hi kum 23 chhung zet major tournament-ah an champion tawh lo a, an vanglaia khawvel dengchhuak ṭhah Juan Roman Riquelme, Hernan Crespo, Juan Sebastian Veron leh Pablo Aimar te pawhin an ram hi an champion pui zo lo. Argentina tana goal khung hnem ber Messi leh a hote hian an hmaa mi huai kaltate tih theih loh hi an ti thei ang em tih zawhna chu chhanin a awm dawn.
Sergio Aguero, Angel di Maria, Ever Banega, Gabriel Mercado leh Sergio Romero te hi kum 2007 khan Under 20 World Cup champion an lo ni tawh a, tunah chuang heng player-te hi kum 28 leh 29 ni tawhin an vanglai a ni - Chile nomawi kawl lai an chhuhsak thei a nih pawhin a mak hran lo ang.
Vidal a lo kir dawn
Chile hian hnam huaisen an nihzia an pholang chho zel a, an match hmasa bera Argentina an hneh loh hnuah goal 15 khung leh tawhin an lamah vawi thum chiah a lut - hei hian tlu mah se an tho leh thei a ni tih a entir a, champion nawn thei an ni.
Midfielder pawimawh Ar-turo Vidal hremna a zo tawh a, Bayern Munich player hian final a khel thei dawn. Ani bakah hian Arsenal forward Alexis Sanchez leh goal ruk khunga top scorer ni mek Eduardo Vargas te hi Argentina tlarhnung su nghing turin an tling tawk.
Chile coach Juan Antonio Pizzi chuan, "Hun harsa kan tawng a, kan paltlang tawh. Tunah chuan team kan inkhairual ṭha a, inrintawkna kan neih san bakah chak duhna thinlung kan nei," tiin champion tura inrintawkna an neih thu a sawi.
2015 final re-match
Nikum khan Chile-in Copa America an thleng a, an ram football chanchina a vawi khat nan major tournament-ah an champion. Chile hian tlarhma nei chhah tak Argentina chu goal khung loa an dan chah hnuah penalty shootout hmangin an hneh.
Kuminah ram pahnihte hi Group D-ah an awm dun a, an match hmasa berah intawngin Angel Di Maria leh Ever Banega te goal khung hmangin Argentina-in 2-1 in hnehna an chang. Ropui zawk nih inchuha player ṭha rual inhmachhawn tur hi khawvel hmuh chak a ni.