Champion nawn tum Arsenal

Pathianni zan dar 9:30 hian Arsenal leh Middlesbrough te'n Emirates Stadium-ah FA Cup fifth round an khel ang. Premier League club Arsenal hi FA Cup champion lai an ni a, Championship club Middlesbrough hi Premier League champion lai Manchester City hnehtu an ni.

Arsenal hian Premier League-ah champion beiseina an nei chau tawh hle. Champions League leh FA Cup-ah an la champion thei a, FA Cup aṭanga Chelsea leh Manchester City te an tlak tawh avangin Arsenal tan Boro nena an inkhel tur hi lak thutak a ṭul hle.

Arsenal-in fourth round-ah Brighton chu 3-2 in an hneh hram a, an khingpui tur Boro hi Championship division a hmahruai mektu an ni. FA Cup fourth round-ah Boro hi Etihad Stadium-ah an zin a, goal an chhuah lo a, goal hnih an khung. Arsenal hmachhawn turin inrintawkna an nei ang.

Arsenal-in inhliam vangin Jack Wilshere, Aaron Ramsey, Mikel Arteta leh Alex Oxlade-Chamberlain te an chhawr thei dawn lo a; amaherawhchu Mesut Ozil a dam tawh a, top scorer Alexis Sanchez a khelh theih a beiseiawm bawk.

Boro manager Aitor Karanka chuan, "Liverpool leh Manchester City kan hneh kha mi tam tak chuan mak an ti hle. Tunah chuan team ṭha tak kan ni tih an hre chiang tawh ang. Game awlsam a ni dawn lo a, chak ngei tumin kan theih tawpin kan bei dawn a ni. Player inhliam an nei nual a, hei hi keini vanneihna a ni. Chutihrualin inhliam hi football-in a ken tel a ni a, Arsenal hi team ṭha zawk an la ni tho," tiin a sawi.