Smart City project-ah Kohima tel zel

Smart City project kal mek a, Thawh-lehni khan Kohima Smart Cities Mission chuan Nagaland Civil Secre-tariat conference hall-ah Smart City Challenge (2016-17) atana hmalak zel dan tur ngaihtuahin meeeting neih a ni.

State social security and welfare minister Kiyanilie Peseyie chuan, fast track cities thawh hnihna kalpui leh mek a ni a ti a, he mi atana proposal chu June 30 hian pek luh leh a nih tur thu a sawi. Smart City Challenge thawh khatna chu khawpui 54 ten an zo fel tawh a, heng khawpui zing aṭang hian a thawh hnihnaah hian khawpui 40 te thlan chhuah an ni dawn a ni. August hian khawpui 40 thlan chhuah te hi puan a ni dawn a, khawpui 23 te proposal chu siam ṭhat tura tih a ni a, a ṭha ber chu thawh hnihnaah hian an tel leh thei dawn a ni.

He hunah hian Kohima Smart City Project kalpui dan te sawiho a ni a, hmalakna tur te an duang bawk. Social security and welfare minister chuan Smart City Project a hlawhtlin theih nan hian mipuite chu ṭanrual a ṭul thu sawiin, a hlawhtlinna pawh kan zavai atan a ni a ti. Kohima hian fast track competition thawh khatnaah point 54 aṭangin point 51 an hmu a, a thawh hnihna hmachhawn leh turin a tling. Parliamentary secretary for Municipal Affairs, R. Tohanba chuan, Kohima Smart City project atan hian vaibelchhe 1,902 vel ruahman chhin a ni a ti bawk.