Pele-a'n pawn chhuah a duh lo

Mi tam takin footballer piang tawh zinga ropui ber ang hiala an chhal Pele chuan damlohna avangin pawn chhuah a duh lo a, a dinhmun ṭha lo tak chu mipui hmuha pholan a duh lo niin a fapa Edinho chuan a sawi. 

Pele hian nikum khan zun kawng lam fel lo avangin damdawi in a lo lut tawp a, tun hnaiah a khel bawr ṭhat lohna avangin tiang leh wheelchair tel lo chuan a che sawn thei tawh lo. 

Edinho chuan, "Puipunna hmuna awm nuam a ti tawh lo a, a dinhmun hi midang hmuh atan a duh lo. Lal ang maia leng vel ṭhin a ni a, vawiinah erawh a duh ang pawhin a kal thei tawh si lo," a ti a, a pa chuan in chhuahsan a duh loh thu a sawi. 

'King of Football' tia mi tam takin an sawi Pele hian a professional career-a kum 21 hun a hman chhungin match 1363-ah goal 1281 a khung a, Brazil tan match 91-ah goal 77 khungin World Cup-ah vawi thum a champion. 

Pele hian kum 1970 khan a career-a a tawp ber nan World Cup nomawi a chawi a, khatihlaia Brazil team kha mi tam takin khawvela football team awm tawh zinga ṭha ber ang hialin an ngai - kumin June hi an champion cham kum 50-na tur 

a ni.