Dr B.C Roy Trophy-ah Mizoram an tla nghal

Junior Boys' National Football Championship for Dr B.C Roy Trophy 2024-25-ah Mizoramin match hmasa berah Odisha 3-2 in an hneh lo a, semifinal luh beiseina a tawp nghal. Odisha hian match hmasa berah Uttar Pradesh 3-1 a an hneh hnuah Mizoram hneh zuiin match hnih khelh turah vawi hnih chakin semifinal an lut.

Narainpur, Chhatisgarh-ah inelna hi neih a ni a, Mizoram hi group A-ah hian Odisha, Uttar Pradesh leh SAI te nena awm tur an ni a, SAI an kal theih tak loh avangin team thum chauh an awm. Coach Lalrozama Fanai hote tan inkhel pawimawh a ni a, 'quarterfinal' ang hiala ngaih theih a ni.

Mizoramin fimkhur takin bul an ṭan a, Odisha erawh RKM Ashrama Ground-a an match hnih khelhna a nih tawh avangin huaisen takin attacking game an khel nghal. Rozama hoten bul ṭan chhe lo mah se minute 15-naah Montu Nag-a ball vawrh luh chu goalkeeper Lalrinzuala'n chhutsualin an lamah a hui lut.

Odisha game a nung sawt a, Mizoram erawh an talbuai chhunzawm. Goalkeeper Rinzuala'n inrintawkna hlohin six yard box chhungah laklawh taka ball kal chu tiperin Odisha-in an hmang ṭangkai a, minute 22-naah Aman Lakra-a'n goal hnihna a khung. Goal hnih luh hnuah pawh Odisha bawk an khel ṭha a, minute 40-naah Naresh Kumar Dhan-a'n keeper Rinzuala tlan chhuak hmuin a pet khum a, halftime-ah 3-0 a ni.

Coach Rozama leh a hote an beidawng duh lo a, second half ṭan chiahah Lalrammawipuia leh John Lalrammawia te lutin goal pawh an khung hma. Minute 52-naah Vansangpuia Ralte hmangin si phurh an sut ṭhen a, inkhel thunun mah se goal dang a lut lawk lo. Injury time-ah Francis Lalhruaizela'n Mizoram tan goal hnihna khung leh mah se goal dang luh nan a tlai hret a, Odisha lakah 3-2 in an vanduai.

Mizoram hian July 31, Nilaini hian Uttar Pradesh nen match hnuhnung ber an khel dawn a, semifinal luh beiseina a awm tawh loh avangin Rozama'n player siksawina hun a hmang a nih pawhin a mak lo ang.