Fabregas-a hnuaia khel tur Varane

Manchester United chhuahsantu Raphael Varane chuan football khawvel barakhaihin Serie A club Como a zawm a, Arsenal midfielder hlui Cesc Fabregas-a enkawlna hnuaiah a khel dawn tihna a ni.

Varane hian Italian club-ah hian kum hnih chhung khel turin contract a ziak a, kum khat dang pawhsei theihna dan a la awm bawk - United-a a contract a hman zawh tawh avangin Como hian free-in an la lut.

Como coach Cesc Fabregas chuan, "Raphael hi player danglam bik a ni a, ani ang player kan la lut hian kan tumna sanzia a hrilhfiah a ni," a ti a, Italian top flight league-ah a tikimtu mai nih an tum loh thu a sawi.

Hello Varane

Como hi Serie A kai thar hlim an ni a, Italian club tenau huanga mi an la ni rih - hei vang hian world class defender Varane-a'n Como zawm a thlang hi mi tam tak mak tih a tling a, Como sulhnu aiin Varane-a sulhnu a ropui zawk!

Kum 31 mi defender hian France tan World Cup leh UEFA Nations League nomawi a chawi tawh a, French club Lens aṭangin bul ṭan mah se, a hming chherna ber erawh Real Madrid a ni. Spanish club-ah hian season 10 zet hun hmangin match 360 a khelhsak a, goal 17 a khung.

La Liga nomawi chu vawi thum chawiin, Champions League-ah vawi li a champion a, Copa del Rey (1), Supercopa de Espana (3), UEFA Super Cup (3) leh Club World Cup (4)-ah te a champion tawh a, a club khelhna tur Como erawh top flight inelnaah an la champion ngai lo!

Cesc vangin...

Varane chuan Cesc vanga Como chu pan a nih tel thu a sawi. France international hlui chuan, "Cesc nen kan intawng leh dawn ta a, tun ṭum erawh ka elpui angin ka tawng dawn ta lo.

"Como ka zawm thei hi ka lawm a, Cesc-a football thlirna leh he game a tuichilhna hian min hneh a ni," a ti a, Barcelona leh Chelsea tan pawha lo khel tawh Spanish midfielder hi Italian club a pan chhan langsar niin a sawi.

Varane hian July 2021 khan Real tana a vanglai hun a hman mek laiin, pound maktaduai 41 bawr velin Red Devils a zawm a, Old Trafford-ah a beisei ang erawhin a hlawhtling tawk lo - hliamin a tlakbuak ve reng bawk a, season thum chhunga match 95 khelin, FA Cup leh League Cup-ah a champion.

Como an ṭha

Kum 21 hnua a vawi khat nan Italian top flight league-ah Como an inpetkai a, tih mai mai an tum lo - World Cup 2018-a France champion puitu Varane hma hian player langsar tak tak an la lut nual tawh.

Liverpool keeper hlui Pepe Reina chu season khat chhung atan inremna an neihpui tawh a, Villarreal-a a contract hmang zotu Alberto Moreno an la tawh bawk - player pahnih tawnhriat ringawt pawh hi Serie A kai thar tan chuan a ṭangkai dawn.

Serie A striker 'hot' ber pawl ni ṭhin Andrea Belotti chu AS Roma aṭangin €4mtd-in an lei a, €1mtd chu a khelh ṭhat dan a zirin an pek belh leh ang - Cagliari centre back Alberto Dossena an la tawh a, kum 20 mi Iraq international Ali Jasim an la tawh bawk.

Hlawh hi?

Varane hian United-ah khan a hlawh hnem hle - kar khatah £340,000 a hlawh nia sawi a ni a, Red Devils nen indawr leh mah se, sum chungchangah an inrem thei lo niin an sawi. Saudi Arabia emaw MLS, sum tamna lam a pan rin a nih laiin Como a zawm daih!

Italian club tenau hian hlawh an pe hnem em ni? tih zawhna chu awm thei a ni a, player langsar dang an awm sa nual avangin mak tih a hlawh bawk. Varane-a hlawh zat chiah hi tarlan a ni lo a, a hlawh hnem theih dan erawh a awm - player langsar dangin an zawm chhan pawh sum a ni ve thei.

Indonesian company Djarum Group chu Como neitu an ni a, share tenau nei zingah Thierry Henry leh Fabregas an tel - Djarum Group neitu Michael Hartono leh Robert Budi Hartono hausakna belh khawm hi $48tld a ni a, Italian club neitu zingah anni aia hausa an awm lo!