MPL11-ah 'star thar' an piang dawn

LZ Juice MPL11-ah goal 68 a lut tawh a, goal khungtu lam aṭanga thlirin tualchhung football-ah star thar an piang ngei dawn niin a lang. MPL hi August 22, Ninganiah khelh ṭan a ni leh dawn chauh a, chuvangin player fitness nei ṭha tawk loh tan pawh insiamṭhatna hun a awm ang.

Tun dinhmunah Aizawl FC winger pahnih Lalbiakdika leh Augustine Lalrochana ten goal nga ve ve an khung a, Ramhlun Athletic forward Felix Lalruatsanga'n goal nga a khung tawh bawk.

Star thar chu

Aizawl FC winger BD-a leh Augustine te hi tualchhung football ngainatute tan chuan mi thar an ni tawh lo a, MPL-ah pawh tawnhriat an nei tawh. Chutihrualin season liam ta thlir kir chuan winger pahnih hi R. Ramdinthara (Tharpuia) leh R. Lalthanmawia (Amawia) ten an hliah khuh.

MPL10-ah Aizawl FC semifinal an lut zo lo a, Champhai Zotlang tlangval BD-a'n goal khat chauh khungin Vairengte tlangval Augustine pawhin goal hnih bak a khung lo.

Tun season-ah Tharpuia leh Amawia te an awm tawh loh avangin BD-a leh Augustine ten khelhna hun an ngah a, match nga lekah goal nga an khung der tawh. MPL-a an chet ṭhat avangin winger pahnih hian I League-ah pawh inrintawkna an neih phah ngei ang.

Ramhlun Athletic forward Felix Lalruatsanga hi season liam ta khan Chanmari FC-ah a inziak lut a, I Day Football-ah inlan mah se MPL atana chhawr tlak turah an ngai lo. Felix hi an khua Serchhip-ah a let a, a theihna hmutu coach Lalrempuia hnuaiah FC Serchhip Kawnpui tan khelin LZ Chhangte Football Festival leh Mizoram Open Football C'ship a champion pui ve ve.

MPL ṭan hmain LPS Cup-ah Republic Veng tan khelin goal nga a khungsak a, hemi zawh hian Shillong League a khel leh bawk. MPL11 khel turin Felix-a a inpeih tawh a, Ramhlun Athletic goal nawrna ber niin player langsar zinga mi a ni.

Engtin zel?

Chanmari FC forward MS Dawngliana'n goal li a khung tawh a, Bawngkawn forward erawh MPL1 aṭanga hming chher tawh a ni. Goal li khung thei dang PC Lalruatsanga erawh MPL-ah mi thar a ni a, Sihphir Venghlun striker hian hmabak a nei êng.

Goal thum khung tawh player pathum an awm. Khawbung tlangval F. Lallawmkima'n MPL10-ah Mizoram Police a champion pui a, MPL9-a FC Bethlehem bench mawitu hian season tinin hma a la sawn zel.

SYS FC winger Ricky H. Vanlalhriatsanga'n goal thum a khung tawh a, ani hi chu goal ringawt aṭanga teh theih a ni lo - a chevel a hmuhnawm takzet. FC Bethlehem striker Danny Zorammawia hi MPL9-a Chawnpui champion ṭuma midfielder kha ni mah se tunah erawh out and out striker angin a khel a, Lamzawl tlangval hian tharum a ngah avangin a position thar hi dinhmun san zawk thlen nan a hmang thei ang.