Liverpool-in Marseille dawrna an hnar

Roberto de Zerbi hnuaia indinthar tum Marseille chuan Liverpool midfielder Wataru Endo lakluh tumin an hel a, mahse, Reds hian pound maktaduai 11.8-a French club dawrna chu an hnar - Marseille hian an dawr nawn dawn em, a la chiang lo.

Kum 31 mi Endo hian season hmasa khan Reds hi Stuttgart aṭangin £16.2mtd-in a zawm a, Bundesliga club ṭhenkhatin thlemchhuah theih an inbeisei bawk - man man zawka dawrtu an awm a nih chuan Reds hian hralh an pawiti dawn lo nia sawi a ni.

Liverpool hian number 6-a khel thei Alexis Mac Allister, Curtis Jones leh Stefan Bajcetic an nei mek a, Endo hi kum 31 a lo ni tawh bawk nen, player naupang lam zel melh ṭhin Liverpool hian ui beh ṭung an tum lo ang.

Chutihrual chuan Endo hi hralh ta se, a thlakna tur lei belh loa hralh ngawt chi erawh a ni dawn lo a, Reds hian hralh tura thutlukna an siam hmain transfer bazar lam an melh ve phawt a rinawm.

Japan captain hi Jurgen Klopp-a duhthlan hmasa a ni lo a, Reds hian a tirah chuan Moises Caicedo leh Romeo Lavia lak an tum. Mahse, Chelsea an ngam loh avangin player pahnih an chân a, Klopp-a'n hmanhmawh takin Endo a la lut.

Endo hian a tirah beisei phak lo mah se, season rei hnuah a khel ṭha tawlh tawlh a, fan-te ngainat pawh a hlawh hle. Reds tan a season hmasa berah match 43 khelin goal hnih a khung a, League Cup-ah a champion nghal.

Japanese midfielder hi USA-a pre-season tour neia zin mek Liverpool squad-ah a tel a, US-a an match hmasa bera Real Betis (1-0) an hneh ṭumin inkhel bul a ṭan.