Russell an hrem vangin Hamilton a chak

Formula 1 Belgium Grand Prix tlan zawh takah Mercedes driver George Russell a thleng hmasa bera a, mahse dan bawhchhiat a neih avangin a dinhmun aṭanga paih a ni a, a aiah pahnihna Lewis Hamilton chu pakhatna atan puan a ni.

Mercedes driver pahnih an che ṭha a, an chungnung viau - hetih lai hian tun hnaiah Max Verstappen chu a season hmasa angin a kal fawr thei lo thung, championship lamah fal takin hma la hruai mah se midangin an nek buai pha ta zauh zauh.

Pakhatna Hamilton

Spa-Francorchamps tlankawnga intlansiakah Mercedes driver pahnih an in um na hle, a tawp dawn lamah phei chuan Russell leh Hamilton hi tu nge chak zawk ang tih rin thiam harsa khawpin an inum tawk a ni.

Intlansiak a zo a, a thleng hmasa ber chu Russell a ni. Mahse, thuneitu lamin car rih zawng an enfiah a, a nih dan tur aiin Russell-a car hi 1.5kg in a lo zang zawk, hei vang hian a nihna hi pawm zui theih a ni lo.

Khawvel car intlansiakna sang berah hian mahni duh ang anga zangin car siam emaw khalh emaw a tih ngawt theih loh, intlansiak zawhah tuialhthei (fuel) tel loin a zang berah 798kg a rit a nih a ngai, hei hi a phak ta lo a ni.

Mercedes chuan an driver pakhat zawk laka an thil tih hi tihsual palh liau liau a nih thu an sawi nghal a, mahse hei hian awmzia a nei tawh lem lo. Federation Internationale de l'Automobile (FIA) dan leh hrai zawm a ngai a ni.

Intlansiak thuneitu sang FIA chuan thuchhuah siamin, "Team lam pawhin endikna an paltlang zo lo tih hi an pawm," an ti a, duh reng vang ni loa an tihsual palh a nih thu an sawi tel ve bawk.

Mercedes boss Toto Wolff chuan, "Pakhatna kan nihna min hlihsak hi kan pawm a ngai. Tihsual kan neih aṭang hian kan inzir ang, pakhatna leh pahnihna ni kawp thei kan nihna remchang kan bawhpelh hi a uiawm hle.

"Lewis pawh kha a tlan ṭha em em tho a, pakhatna nih phu khawpa a tlan tho avangin a lawmawm," a ti. World champion vawi sarih ni tawh Hamilton hian season tharah chuan Ferrari car a khalh ang.

Red Bull leh Max

Intlansiak tak tak neih hmain qualifying tlan a ni ṭhin, hei hian an bul ṭanna tur thlengin a nghawng avangin a pawimawh hle a, vawi khat tlan fuh ringawt loin kar tawp pumpui hman ṭhat a ngai tihna a ni.

Qualifying lamah chuan Max Verstappen a tlan chak ber, mahse car engine hman dan chungchangah ban phal baka a chet avangin hrem a ni a, a hmasa ber aṭanga tlan chhuak tur kha 10-naah a awm a ngai ta zawk.

A tlan chhuahna a hnung deuh a, intlansiak pumpuiah theihtawp chhuah mah se atan dawhsan (podium) lawn phak a harsa, season hmasa lama F1 an thunun ang khan kumin chu Red Bull an che thei rih lo.

Dutch tlangval Verstappen chuan, "Intlansiak pangngai hrim hrim kha chu kan ti chhe lo, ka hmaa tlante kha an chet ṭhat em avangin tlan pelh kha an harsa takzet a ni, a tir lamah khan duhthusam angin ka che thei lo bawk.

"Season kan hman dan pumpui thlir chuan kan dinhmun hi a chhe lo a, chutihrualin tun hnaia team dang hmasawn dan kan thlir chuan keini lam pawh intlahdah thei kan ni lo, hma lam kan pan a ngai," tiin a sawi.

Red Bull driver pakhat zawk Sergio Perez pawh an team boruak leh car chhehvelah a lawm lo, tuna tlan zawh tak Belgian Grand Prix hi Red Bull car a khalhna hnuhnung ber pawh a ni hial mai thei, a hma hun an ngaihtuah dawn.

Car intlansiakna sang ber hi nipui chawlh an hmang zuai dawn, season chawhma lam an tlan tawh chinah chuan Verstappen-a'n point 277 hmuin hma a hruai mek - August 25, Pathiannia Max-a te ram Netherlands-ah Dutch GP an tlan leh ang.