Barcelona-in Gundogan hralh phal

Manchester City captain armband kalsana Barcelona zawmtu Ilkay Gundogan chu season hnih hnu lawka Barcelona chhuahsan thei dinhmunah a ding mek a, German midfielder hi Qatar club Al Sadd leh Saudi Pro League club pakhat, an hming tarlan lem loh chuan an hel mek niin an sawi.

Germany captain hian kum 2025 thleng chauh Barca-ah hian contract a nei a, sum lama talbuai ve tak Catalan club hian a thlawna chân ai chuan sum tuak nan German midfielder hi hralh an pawi ti lo nia sawi a ni.

An sum dinhmun ṭhat loh vanga talbuai ve tak Barca hian Euro 2024-a Spain tana che ṭha tak, Athletic Bilbao winger Nico Williams leh RB Leipzig midfielder Dani Olmo te chu Nou Camp lamah seng luh tumin hma an la mek a, player pahnih la lut tur hian euro maktaduai 100 vel an mamawh.

Hetiang a nih avang hian an squad aṭanga player hralh ṭhen tur an dap nia sawi a ni a, Ronald Araujo, Frenkie de Jong leh Ansu Fati te pawh hralh an duh. Mahse, De Jong leh Fati bik hi an inhliam mek a, kum 2024 tawp hma chu an inlan theih a rinawm loh avangin an hralh theih a rinawm rih lo.

Hetihlai hian Brazilian winger Raphinha chu Saudi Pro League club pahnih Al-Hilal leh Al-Nassr ten an hel mek a, €90mtd man a nih a rinawm. Catalan club-a beisei phak lo Vitor Roque pawh Barca hian hralh an phal a, mahse, Saudi Pro League club lamin an duh Brazilian forward hian chhuah a duh lo niin an sawi.