Arsenal-in Merino lam an hawi

Mikel Arteta hnuaia Premier League champion nih tum Arsenal-in nipui transfer-ah an mit an len chhunzawm zel a, defender Riccardo Calafiori chungchang an chinfel hnaih avangin Mikel Merino lam an hawi zui niin an sawi.

Kum 28 mi midfielder hi Real Sociedad tan a khel mek a, Euro 2024 champion Spain team-ah khan a tel. Euro-a a hming a chher avangin Arsenal bakah hian Barcelona leh Atletico Madrid ten an duh nia sawi a ni a, Gunners hian Calafiori lama an hun tam zawk an hman avangin Sociedad an la be pawp rih lo.

Sociedad pawhin an player hi an hnena cham turin contract thar an zawrh mek a, mahse, Premier League-a Newcastle United tan pawha lo khel tawh player hian a pawm rih lo - kum 2025 thleng chauh contract a nei tawh a, Spanish club tan a thlawna chhuahtir leh tho ai chuan tuna hralh mai hi a finthlak mai thei.

Osasuna leh Borussia Dortmund tan pawha khel tawh Merino hian season hman zawh takah khan Sociedad tan inelna hrang hrangah match 45 khelin goal riat a khung a, assist vawi nga a nei. Spain tan match 28 khelin goal hnih a khung tawh a, ram tana a goal hnihna hi Euro 2024 last 16-a Germany an hnehna goal kha a ni.