De Gea-a'n club la nei thei lo

Manchester United goalkeeper chhuanvawr ni ṭhin David de Gea-a'n club a la nei thei lo tluang zel - tun hnaiah Italian club Genoa zawm tur anga sawi thawm a awm hman a, mahse, Spanish keeper hian hlawh a phut hnem avangin an inrem thei leh lo.

De Gea hian nikum July khan Old Trafford a chhuahsan a, mahse, khawvela keeper langsar pawl ni chungin club a hmu hleithei lo - a duhtui piah lamah a hlawh phut sang ṭhin chu a buaina pakhat niin a lang.

Tun nipuiah pawh Serie A club Genoa hi a zawm mai dawn niin a lang hman a, mahse, Sky Sports reporter Dharmesh Sheth chuan, "De Gea hian Genoa tana pek theih loh tawp tur hlawh a ngiat a ni," a ti a, Serie A club hian keeper dang an zawng zui ang.

Kum 33 mi De Gea hian United-ah khan kar khatah £375,000 a hlawh a, khawvela keeper hlawh hnem pawl a ni. Club langsar ni lo Genoa ang tan chuan hemi zahve chauh pawh pek hi a harsa ang tih chu thil lang chiangsa a ni.

Hetihlai hian Saudi Pro League lam pawh lam rik an lo ni tawh ṭhin a, De Gea hian hlawh a phut sang reng a nih chuan European football-ah kan hmuh chhunzawm loh a rinawm zawk.