India tennis zinkawng a tawp

Paris Olympic neih laiah India tennis team chuan medal an la phak dawn lo, mipa singles leh doubles huangah inlan ve mah se an match hmasa berah an tlawm nghal ve ve a ni.

Singles lamah Sumit Nagal a inlan a, a khingpui Corentin Moutet nen an inkhel tawk hle - darkar hnih leh minute 28 an inkhelh hnuah India tlangval hi 2-6, 6-4, 5-7 in a chak lo zawkah a ṭang.

Nagal hian chak thei turin hun ṭha a nei hman, set thumna an khelh laiin a tir lamah 2-0 in hma a hruai, mahse amah service a hum vek thei bik lo a, a tawpah a ruh no zawkah a ṭang ta a ni.

Mipa doubles huangah Roham Bopanne leh N Sriram Balaji te an ṭangdun a, tualchhung mi Edouard Roger-Vasselin leh Gael Monfils te ṭangdun lakah 5-7, 2-6 in an chak lo.

Paris Olympic hi kum 44 mi Bopanna tan India aiawha a inlan hnuhnung ber a nih tawh a rinawm, a hmain ram leh ram tennis team hmanga inelna Davis Cup aṭangin a chawlh thu a lo puang tawh bawk a ni.