Bul ka ṭan fuh vangin ka lawm - Sindhu

PV Sindhu chuan Pathianni khan Paris Olympic a hmachhawn ṭan a, a match hmasa berah harsatna tawk loin a khingpui Fatima Nabaaha Abdul Razzaq a hneh.

India nula chhuanvawr Sindhu hi Group M-ah a awm a, La Chapelle Arena-a inkhelah Maldives mi Abdul Razzaq hi minute 29 chhung lekin 21-9, 21-6 in a hneh a ni.

A vawi thum nana Olympic medal lak tumtu Sindhu chuan, "A bul ṭanna a fuh hle a, court chhung leh a pawn lam boruak thleng khan a fuh hle a ni, ka khelh danah pawh sawisel tur ka nei tam lo.

"Paris khawpui boruak mil turin training kan nei a, chu chuan nasa takin min pui niin ka hria," a ti. Sindhu hi Prakash Padukone kaihhruaina hnuaiah a khel a ni.

Tokyo leh Rio Olympic medal la tawhtu Sindhu hian a match lehpek atan, Nilaini hian Estonian mi Kristin Kuuba a hmachhawn leh dawn a, a chesual viau a nih ngawt lo chuan chak tura rinkai zawk a ni.

Mipa singles lamah HS Prannoy pawh a chak - Indian tlangval hi group K-ah awmin Germany aiawhtu Fabian Roth chu 21-18, 21-12 in a hneh, chak tur hian minute 45 chhung hun a hmang.