Chelsea lei tum lo Sir Jim Ratcliffe

Sir Jim Ratcliffe chu Premier League-a club nei tur anga sawi thawm awm mah se Britain-a hausa ber hian English club neih tumna a neih loh thu a sawi a, "Ka duh ang chu ka nei tawh a ni," a ti. 

Pound tluklehdingawn 18 chuang hausakna nei Ratcliffe hian Chelsea a lei dawn nia sawi thawm a awm hman a, mahse petrochemicals firm Ineos neitu chuan, "English top flight club-te man zat hi a uchuak hret a ni," tiin a sawi. 

Ratcliffe hian French Ligue 1 club Nice chu nikum August khan leiin neitu nihna a nei mek a, Swiss second division club Lausanne a nei bawk. 

Kum 67 mi sumdawng hausa chuan, "Nice nena kan dinhmunah hian kan lawm tawk em em. Theihtawp kan chhuah mek reng a, player talent nei ṭha an tamin a league hrim hrim hian chona phurawm tak min chhawpsak a ni," a ti. 

Ratcliffe hian Formula 1 pawh luhchilhin a company Ineos chuan Mercedes nen kum nga chhung thawk dun turin Thawhṭanni khan contract an ziak. 

Ineos hian Mercedes hnenah hian kum nga chhung chu kumtinin pound maktaduai 20 an pe ṭhin dawn a, Cycling team 'Team Ineos' an nei mek bawk.