Gerrard-a'n Wembley a pan zel

FA Cup-a vawi sarih champion tawh Liverpool-in Selhurst Park-ah Crystal Palace an lehthal a, 2-1 a chakin quarterfinal an lut. Inhliam vangin Steven Gerrard squad-ah tel lo mah se Liverpool-in an captain hi Wembley Stadium kawng an zawh pui zel.

Inrinni zan inkhelah Crystal Palace-in minute 15-na lekah Fraizer Campbell goal thun hmangin hma hruai a; Liverpool-in second half ṭan tirh a Daniel Sturridge leh Adam Lallana te goal hmangin mualneitu Palace hi an lehthal.

Sturridge a kir

Liverpool-in inhliam vangin captain Stevie G bakah Lucas Leiva leh Raheem Sterling te an chhawr thei lo. Tlar hma tichak turin starting eleven-ah Sturridge a tel a, bench-ah Tottenham lama chakna goal khungtu Mario Balotelli a awm bawk. Arsenal forward hlui Marouane Chamakh leh Manchester United youth system chhuak Fraizer Campbell te'n Palace tlar hma an rawn mawi thung.

Inkhel chu

Liverpool hi FA Cup-a team la dam zingah League table aṭanga chhutin a ṭha pathumna an ni a, Arsenal leh Manchester United chiah an chunga awm team an dam tawh avangin champion-na chance a ṭha hle.

Amaherawhchu minute 15-na lekah defender Martin Skrtel fimkhur loh vanga Dwight Gayle chance neih chu keeper Simon Mignolet-a'n dang hman mah se a per chu Palace forward Campbell tan duhthusam a ni a, 1-0 a ni.

Liverpool-in inkhel an thunun a, Lallana leh Philippe Coutinho te goal khung tur chu Palace keeper Julian Speroni-a'n ṭha takin a dan sak a; Joe Allen ball pet goal zawnah a kal lo bawk.

Second half-ah Palace an ṭang zo ta ngang lo a, Liverpool midfielder Jordan Henderson-a ball fing tak chu Sturridge-a'n minute 49-naah goal-ah a chan tir. Substitute Balotelli freekick, keeper Speroni-a dan per chu Lallana'n Liverpool goal hnihna atan a khung.

Minute 58-naah Liverpool 2-1 in hma an hruai a, goal dang a luh belh tawh lo.

Sturridge an fak

Daniel Sturridge-a dam hnuah Liverpool an cheṭha a, English forward hian a inhliamna aṭanga a dam hnuah vawi nga a khel leh tawh a, ṭum li an chak.

Liverpool boss Brendan Rodgers chuan, "Daniel-a rawn kir hian team a tiphur a ni. A theihna hi thlir ula, a tlan chak bakah a ball khawih a dik a, goal khung turin chance a mamawh tam lo. Selhurst Park-a kan chak loh ṭum leh tuna kan khelh dan hi chu inthlau tak a ni, a ṭha zawngin hma kan sawn zel e," tiin an khelh dana a lungawi thu a sawi.

Ngaihnawm
Liverpool-in November 23-a Crystal Palace an hneh loh hnuah inelna hrang hrangah match 22 an khel leh tawh a, vawi hnih chiah chak lo an nei.
FA Cup-a Liverpool champion hnuhnun ber chu kum 2006 kha a ni. Hemi ṭum hian Liverpool-in fourth round replay-ah Bolton 2-1 in an hneh a, hun tawp hma minute li chhungin Liverpool hian goal hnih an khung.
990 FA Cup semifinal-ah Palace-in Liverpool an hneh a, chakna goal khungtu chu tuna Palace boss Alan Pardew a ni.