Scholes-a sawisel vangin Van Gaal a buai lo

Manchester United manager Louis van Gaal chuan Old Trafford-a ngaihdan rawn Paul Scholes sawiselna vanga a buai loh thu a sawi.

United player hlui Scholes hian Van Gaal-a hnuaia United khelh danin tun hmaa club khelh dan phung an hloh thu leh en hreawm a tih thu a sawi chhuak.

Dutch manager Van Gaal chuan, "Tun dinhmunah chuan Paul Scholes-a thusawi vangin ka buai lo. Scholes hi United fan a ni a, fan chuan kan khelh dan hmang hi an sawisel thiang a ni," tiin a sawi.

United khelh dan hmang sawi zuiin Van Gaal chuan, "Khelh dan system hi panga emaw paruk emaw vel kan hmang tawh a, a ṭha ber tur ka la zawng mek a ni. Tunah chuan 4-4-2 formation-ah hian attacking player ka dah luh tam theih avangin a ṭha ber rihin ka hria. Hetia a ṭha ber tur kan la zawng chung pawh hian kan result hi a chhe lo a, kan tlar hnung a phui ṭha a. Chuvangin tuna kan khelh dan chinah hian lungawi lohna lutuk tur ka hre lo," tiin a sawi.

United boss hian keeper Victor Valdes chungchang sawi zuiin, "Kum khat chuang chawlh chuan inelna hniam zawka an khelh hamsak hi a ṭul ṭhin. Ashley Young pawhin a khel a, Michael Carrick pawhin a khel a, Valdes a nih vangin a danglam thei lo - kalphung pangngai a ni," tiin player tinin ngai awh leh turin second team aṭanga an ṭan ṭhin thu a sawi.

Dutch manager chuan sawi chhunzawmin, "Keeper ṭha tan second keeper-a lungawi a theih loh a, amaherawhchu khelhna hmun chang tur chuan a theihna a lantir phawt a ṭul," tiin a sawi.