FA Cup-ah Stoke an mualpho

Joshua King hattrick hmangin Blackburn Rovers-in an khelmual Ewood Park-ah Stoke City 4-1 in an sawp a, FA Cup quarterfinal an lut.

Inrinni zan khan Mark Hughes-a'n a club enkawl hlui Blackburn Rovers a hmachhawn a, Stoke-in minute 10-na leka Peter Crouch-a goal hmangin hma hruai mah se minute 36-naah Manchester United youth system chhuak King-a'n Blackburn siphurh a sut.

Norwegian forward hi Stoke tlar hnung tak a hnawksak a, first half tawp hma hretin Geoff Cameron lakah penalty a hlawhchhuak a; Cameron hi hnawhchhuah a niin Rudy Gestede-a'n penalty aṭangin Blackburn hma­hruaina goal a khung.

Second half-ah player tam zawk Blackburn-in inkhel an thunun a, King-a'n goal hnih dang a khung belh. Premier League club Stoke City an mualpho a, 1-4 in an chak lo.

Blackburn manager Gary Bowyer chuan, "Ho takin goal kan chhuah a, chutihrualin kan talbuai phah lo. Supporter-te leh player-te thawhrah a ni. Season tawpa result ṭha zawk nei turin tuna kan chakna theihngilh a, kan khelh hmabak atana ngaihtuahna kan sen a pawimawh ang," a ti.

Bowyer hi Mark Hughes-a'n Blackburn a enkawl lai a, Hughes hian 2007 khan Blackburn hi FA Cup semifinal a thlenpui tawh a ni.

Stoke manager Hughes chuan, "Kan khel ṭha tawk lo a, King leh Gestede te kha kan chelh thei lo a ni ber. Blackburn kha kawng engkimah an chungnung a, chak an phu a ni," tiin a sawi.

Inkhel dang

Premier League club pahnih inkhelah West Brom-in an khelmual Hawthorns-ah West Ham 4-0 in an sawp. West Brom tan an player manto ber Brown Ideye-a'n goal hnih a khung a, James Morrison leh Saido Berahin te'n goal khat ve ve an khung bawk.

West Brom hian kum 2008 hnua a vawi khatna atan quarterfinal an lut. Goal hnih khungtu Ideye hi pound maktaduai 10 man a ni a, West Brom tana match hmasa 17-ah goal hnih lek khung mah se match hnuhnung pathum - Burnley, Swansea leh West Ham an hmachhawn ṭumin a pet goal vek.

West Brom manager Tony Pulis chuan, "Ideye hi player ṭha tak a ni a, pressure a ngah avangin a tir lamah beisei pha lo mah se tunah chuan a theihna tak tak a pho­chhuak ta," tiin a sawi.

Reading-in Janaury thlaa an lak luh Yakubu goal hmangin Derby 2-1 in an hneh. IPro Stadium-ah first half-ah goal a lut lo a, minute 53-naah Reading-in Hal Robson-Kanu hmangin hma hruai mah se Derby-in minute 61-naa Darren Bent-a goal hmangin an sut a. Substitute Yakubu-a'n minute 82-naah chakna goal a khung.