Real-in hma an hruai chhunzawm

Inrinni zan khan Real Madrid-in an khelmual Santiago Bernabeu-ah Deportivo La Coruna chu 2-0 a hnehin La Liga-ah hma an hruai chhunzawm zel.

Real-in bul an ṭan ṭha a, La Liga top scorer Cristiano Ronaldo chuan free-kick aṭangin goal a khung teuh nghal hle. Khawvel player manto ber Gareth Bale pawhin goal khungna hun ṭha hmu mah se crossbar-in Deportivo a chhanhim. Minute 22-naah Spainish midfielder Isco-a'n Real hmahruaina goal a khung a, first half-ah 1-0 a ni.

Second half-ah Deportivo lam an insiamṭha a, midfielder Celso Borges-a'n goal khungna hunṭha a hmuh a bawhpelh a, Spanish striker Oriol Riera goal khung tur chu Real keeper Iker Casillas-a'n a dan sak bawk. Minute 73-naah Karim Benzema-a'n mualneitu goal hnihna ak hung a, goal dang luh belh loin Real Madrid 2-0 in an chak.

Real Madrid forward Ronaldo-a'n tun season-ah goal 28 a khung tawh a, match hnuhnung pathumah goal a khung lo - kum 2013 hnua goal khung lo a game thum a khelh zawn lehna chiah a ni. Tunhnai a mi tam takin a thatchhia ti a an sawisel French international player Karim Benzema chuan goal a khung ve leh ta a, a goal khung vang hian an sawiselna tam tak chu a ziaawm phah ngei beisei a ni.

Real Madrid hian game 23-ah point 57 hmuin an hnuai chiaha awm Barcelona aiin point liin an hmu sang zawk. Pathianni zan khan Barcelona-in Nou Camp-ah Levante an mikhual a, result a zirin table a danglam ang.

Real boss Carlo Ancelotti chuan, "Inkhelh awlsam tak a ni lo a, kan khingpuite kha an khel ṭha em em a tawpah kan vannei ta zawk a ni. Atletico Madrid nen kan inkhelh ṭum khan kan khel ṭha lo a, chuti chung chuan supporter-te'n min thlawp tlat a, an chungah kan lawm hle a ni," tiin a sawi.

Inkhel Results

Almeria 2 - 2 Real Sociedad

Sevilla 3 - 0 Cordoba

Real Madrid 2 - 0 Deportivo

Granada 0 - 0 Athletic Club

Málaga 0 - 2 Espanyol