Fiorentina chak zanah Napoli chak lo

Season tharah Fiorentina-in Champions League khelh ngei an tum tih an lantir a, Inrinni zan khan khualmualah Sassuolo 3-1 in an hneh. Table-a pathumna dinhmun hauhtu Napoli chuan Palermo chu 3-1 thoin an hneh lo.

Sassuolo khelmual a inkhelah hian mikhual team an chungnung zawk a, mikhual tan hian striker Khouma Babacar chuan goal hnih khungin a cheṭha hle. Ani bakah hian Chelsea aṭanga an hawh Mohamed Salah chuan minute 30-naah goal a khung bawk. Mualneitu lam tan hian Italian Domenico Berardi chuan goal khat khung ve mah se a team-te hi Fiorentina lakah a chhanhim zo lo.

He result avang hian Fiorentina chuan season thara Champions League khelh an beiseina chu an chhawm nung zel a, game 23 khelh tawhah point 38 hmuin table-ah palina an ni mek. Sassuolo erawh table-ah 12 niin an dinhmun a ṭha rih lo hle a ni.

Napoli chuan an chung chiaha awm AS Roma hnaih theihna hun ṭha an neih chu an chhawr ṭangkai zo lo a, an kingpui Palermo lakah 3-1 in an tlawm a ni.

Mualneitu Palermo-in inkhel bul an ṭan ṭha zawk a, minute 14-na lekah Achraf Lazaar goal thun hmangin hma an hruai nghal. Franco Vazquez chuan chawlhlawk hma chiahin goal a khung leh a, first half-ah Palermo-in 2-0 in hma an hruai.

Second half-ah Napoli lamin an si phurh sut let ngei tumin nawr mah se goal Palermo tlarhnung an su hawng zo meuh lo. Minute 82-naah Manolo Gabbiadini hmangin goal khung ve mah se goal dang an khung belh theih tawh loh avangin point thum hlu tak an hloh.