PSG in hunṭha bawh pelh

French champion Paris St Germain-in hmahruaina hun ṭha an neih an hmang ṭangkai thei lo a, Inrinni zan khan an khelmualah Caen nen 2-2 in an inhnehtawk.

Parc des Princes hmuna inkhelah PSG-in minute hnihna lekah Zlatan Ibrahimovic-a goal hmangin hma an hruai nghal a, Argentine forward Ezequiel Lavezzi chuan minute 40-naah an goal hnihna khung leh a. First half-ah 2-0 a ni.

Second half ṭan hnuah pawh inkhel boruak a danglam nghal mai lo a, PSG an cheṭha chhunzawm zel. Amaherawhchu hun tawp lamah PSG lamin goal thun belh aiin an goal neihsa venhim an ngai pawimawh a, an tisual. Caen tan Argentine Emiliano Sala-a'n huntawp hma minute khat chauh a awm tihah a goal a khung a, Herve Bazile-an minute 90 naah goal pawimawh a khung leh bawk. 2-2 a nih hnuah PSG tan goal dang khung belhna hun a awm tawh lo a, team pahnihin point khat ve ve an insem.

Inrinni zan inkhelah hian Ibrahimovic chuan yellow card a hmu leh a, hei hi tun hnai game 10 chhung a yellow card vawi thum a hmuhna a ni. Swedish forward hian March 1-a Monaco nen an inkhelh turah a inlan ve thei lo ang.

PSG hi van vanduai ve hrim hrim a; Yohan Cabaye, Marquinhos, Serge Aurier leh Lucas Moura-te chu inhliam vangin lakchhuah an ngai a, PSG hian subtitution an hman zawh tawh avangin inkhel a tawp meuh chuan player 10 chauhin an khel tluan a ni.

French Ligue game 25 khelh tawhah PSG hian point 49 hmu tawh a, table-ah pathumna an ni mek. Hmahruai mektu Lyon-in khelh 24-ah point 50 hmuin hma an hruai chhunzawm zel. Thawhlehni khian PSG hian Champions League last 16-ah Chelsea an hma chhawn ang.