I League-a Mohammedan petlingtu Hriangtlang tlangval

17th October, 2020

Mohammedan SC-in Mizo tlangval Vanlalbiaa Chhangte goal hmangin I League an khel dawn.

Nimin tlaia Hero I League Qualifier inkhel pawimawh takah Mohammedan hian Bhawanipore FC 2-0 in an hneh a, match khat khelh tur la awm mah se head to head en a nih avangin Black Panthers-in pakhatna dinhmun an hauh chiang tawh.

Bhawanipore hi Sankarlal Chakraborty-a'n a ho a, Mohun Bagan coach hlui hian an match hmasa pahniha goal khungtu pahnih Philip Adjah leh Pakaj Moula te bul a ṭantir. Mohammedan lamin tlarhmaah Willis Plaza an dah a, Mabiaa Chhangte pawh ṭum dang ang thoin bul ṭantu zingah a tel.

Kalyani Stadium-a inkhelah team pahnih an inhnehtawk a, Mohammedan-in ball chang tam hret mah se Bhawanipore-in chance ṭha an ngah zawk. Neroca striker hlui Philip Adjah-a'n goal ban a pet per bakah chance ṭha a hlah bawk.

Minute 27-naah Mohammedan-in passing hmanga Bhawa-nipore tlarhnung ṭhiatin Mabiaa'n a hmawr a bawk. Willis Plaza ball pek chu SK Faiaz-a'n box chhunga ti perin Mabiaa hian keeper bum nan a hmang a, goal pawimawh a khung.

Second half-ah Bhawanipore-in goal khung duhin Bikramjit Singh aiah Jiten Murmu an luhtir a, Bengali forward hian a hun ṭha neih a hmang ṭangkai thei lo. Mohammedan erawhin coach Yan Law an ban a, head coach nei loin khel mah se khelmualah an talbuai phah lo a, second half-ah Gani Nigam hmangin an khung belh a, 2-0 in inkhel a tawp.

Kerala winger Gani hi Pune City tana a khelh laiin Chanmari FC-in loan in an la chhuak a, Mizoram Premier League-ah a inlan tawh. Mohammedan tana goal khungtute pahnih hi MPL-a sulhnu nei tawh ve ve an ni.

I League Qualifier-ah Mizo pakhat chauh hmuh tur awm mah se Mizo awm chhun a langsar. Hriangtlang tlangval hian goal pawimawh bik a khung a, Mabiaa hi Mizoram chhung aṭanga inchher hriam liau liau a nih avangin Mizo football tan a hlu lehzual.

Mabiaa hi Serchhip DFA junior team aiawha a khelh aṭangin hriat a hlawh ṭan a, Aizawl FC Academy-ah awmin senior team-ah hmun a chan theih mai loh avangin khelhna hmun chang turin Chanmari West a pan. MPL-ah West Warrior tan hming a chher a, Chanmari FC zawm lehin heta ṭang hian Mohammedan SC hi a zawm a ni.