India-in Pakistan a ngam

Pathianniah Cricket khawvelin a hmuh chak a hmu a, ICC World Cup-ah India leh Pakistan an inkhel a, run 76 in India an chak. Virat Kohli chuan India tan run 107 a siam.

Pakistan leh India hi tun hmain World Cup-ah vawi nga an lo inhmachhawn tawh a, Pakistan-in vawi khat mah hnehna an la chang zo lo. Kum 2015 World Cup a thleng a, Pakistan an la chak zo chuang lo a, World Cup bika India an hneh loh vawi rukna a ni ta.

He inkhel hi Adelaide Oval, Adelaide-ah khelh a ni a, mi 47,000-in an en a, TV kal tlangin khawvel pumpui­ah mi tluklehdingawn 2.5 in an en bawk.

Inkhel chu

India an bat hmasa a, India batsmen-te Pakistan bowler te'n an ngam lo hle. World Cup hmaa a chet ṭhat loh vanga sawisel hlawh tak Shikhar Dhawan leh Rohit Sharma-te'n India tan bul an rawn ṭan a, reiloteah Rohit Sharma a out nghal. Kum 27-a upa batsman hian ball 20 hmachhawnin run 15 a siam.

Dhawan-a'n tun hnaia amah sawiseltute field chhungah a chhâng a, ball 76 a hmachhawnah run 73 a vaw chhuak a, a khel ṭha hle. Suresh Raina chuan ball 56 lek a hmachhawnah run 74 a rawn vaw chhuak bawk a, Pakistan bowler ho a ngam hle.

India innghahna Kohli a hun takah a che ṭha bawk a, kum 26-a upa Delhi tlangval hian ball 126 a hmachhawnah run 107 a vaw chhuak a, dinhmun duhawm takah India a hlangkai.

Over 50 an khelh zawh meuh chuan India in run 300 siamin mi pasarih an out a, Pakistan tan target huphurhawm tak an tuksak. Pakistan tan wicket nga laa run 55 chiah petu fast-bowler Sohail Khan che ṭha mah se a ṭhiante an chet ṭhat ve loh avangin India-in run 300 an tlin.

Pakistan tan India umpha turin run 301 siam a ngai a, huphurhawm tak a ni. Pakistan tan captain Misbah-Ul-Haq a che ṭha a, ball 84 a hmachhawnah run 76 a siam. Pakistan batsmen ten India bowler te an ngam lo a, Misbah tih lohah chuan Ahmed Shehzad chu run siam hnem ber niin ball 73 a hmachhawnah run 47 a vawchhuak.

India batsmen an chet ṭhat ang bawkin bowler lam pawh an che ṭha a, Mohammed Shami chuan run 35 chiah pein wicket li a la. Pakistan hian over 47 thleng an tlin a, run 224 vawchhuakin an vaiin an out vek. Run 76-in India an chak ta a ni.

Sachin thlaktu Kohli?

Sachin Tendulkar thlaktu ang hiala mi tam takin an sawi Kohli hi India cricketer zinga ODI-a century siam hnem ber dawttu a ni ta a, vawi 22 ngawt century a siam. A chunga awm ODI century vawi 49 siamtu Sachin erawh a la pha lo hle.

Hetih lai hian kum 26-a upa Delhi tlangval Kohli hian Sachin-a tih theih loh a ti a, Indian cricketer zinga World Cup-a Pakistan laka run 100 siam tling hmasa ber a ni. World Cup bika Pakistan laka Indian cricketer run siam hnem ber chu Tendulkar tho niin 2003 World Cup, South Africa a neihah khan Pakistan lakah run 98 a lo vaw chhuak tawh a, hei hi Kohli hian a rawn khum ta a ni.

India vice captain Kohli hian World Cup-a a game hmasa berah a khel ṭha thei hrim hrim a, Kum 2011 a India an champion ṭum khan India match hmasa berah century a lo siam tawh a, hemi ṭum hian Bangladesh hmachhawnin ball 83-ah century a siam thei a ni.

Dhoni a hlim

India captain MS Dhoni chuan, "Bul ṭan ṭhat hi a pawimawh em em a, bul kan ṭan ṭha a ka lawm hle. Kan batsmen Dhawan, Kohli leh Raina-te an khel ṭha takzet a, a hun takah India tan an rawn dingchhuak a ni," tiin a vawtu lam a fak.

India ṭantute hnenah lawm­thu a sawi a, "Kan fans rinawm tak tak, a bik takin India aṭanga he match en tura rawn kal vang vangte hi kan chakna an ni a, min ṭawiawm avangin an chungah kan lawm hle," a ti bawk.