Signal Iduna Park-ah hlimna a thleng

Marco Reus-a'n a contract thar lawm nan Mainz lamah goal khat a khung bakah Pierre-Emerick Obameyang goal khung tur a siam sak a, Neven Subotic leh Nuri Sahin te'n goal khat ve ve an khung bawk. Signal Iduna Park-ah mualneitu Dortmund hi 4-2 in an chak a, relegation zone an chhuahsan.

Zirtawpni zan inkhelah hian Colombian midfielder Elkin Soto-a'n second 53-na lekah Mainz hmahruaina goal a khung a, Dortmund supporter-te an hlauthawng hman hle. Amaherawhchu, Dortmund an khel ṭha zui a, first half-ah goal luh belh lo mah se Reus leh Pierre-Emerick Aubameyang te goal khung tur chu goal ban leh keeper Stefanos Kapino-a'n a dan sak.

Second half ṭan aṭanga minut elina lekah Dortmund-in an siphurh an sut a, Serbian defender Subotic-a'n corner aṭangin a tauh goal ṭha hle. Minute 55-naah player thar Kevin Kampl pass ṭha zet chu Reus-a'n keeper Kapino bum nan hmangin Dortmund hmahruaina goal a khung.

Hmahruai hnuah Dortmund an fimkhur tawk lo a, minute khat hnu lekah Lebanese Yunus Malli-a'n Mainz tan a rawn sut. Entu mipui 80,000 zet an hawi hai hle.

Minute 71-naah Reus dang­lamna a lang nawn a, a ball pass ṭha tak hmangin Aubameyang-a'n Mainz tlar hnung bumin Gabon forward hian Dortmund goal thumna a khung a. Minute 78-naah Sahin-a'n Dortmund goal lina rawn khung lehin mualneitu 4-2 in an chak.

Dormund hian point 22 hmuin table-ah 14-naah an awm a, tunkar tawp hian table mawngphaha awm Stuggart an hmachhawn ang a. February 24-ah Italian champion Juventus nen Champions League Round of 16-ah an in hma-chhawn leh bawk ang.