2015 National Games a Ṭiak ta

National Games vawi 35 na chu Inrinni zan khan Kerala khawpui Thiruvananthapuram-ah a kharna hun neih a ni.

National Games hi Kerala state khawpui pasarih Thiruvananthapuram, Kollam, Alapuzha, Ernakulam, Kozhikode, Trissur leh Kannur-ah te neih a ni a, infiamna chi hrang hrang 33-ah inelna neih a ni.

Services Sports Control Board an che ṭha ber a; medal 159 an la a, gold medal 91 zet an la. A thlengtu Kerala-in medal la hnem berin medal 162 zet la mah se gold medal 54 chiah an la a, Services hi gold medal lak tamah medal 37 zetin an pah lo.

Tuichen thiam an langsar

Kumin National Games-ah swimming lam ti mi te an che ṭha a, Best Male Athlete of the Games latu Sajan Prakash leh Best Female Athlete of the Games lawmman latu Aakanksha Vora te chu tuichenthiam ve ve an ni.

Kerala tlangval Sajan Prakash-a'n gold medal paruk leh silver medal pathum a la a, kumin National games-ah ani aia medal la hnem an awm lo. Prakash hian 200 Meter butterfly and 1500 Meter freestyle-ah te national record thar a siam bawk.

Best female athlete lawmman latu Aakanksha Vora hian gold panga lai lain silver pakhat a la a, hmeichhe infiammi zingah a aia che ṭha an awm lo.

Northeast ti hmingṭhatu Dipa Karmakar

National Games-ah Tripura nula Dipa Karmakar a che ṭha hle. Karmakar hi Gymnastics inelnaah Tripura aiawhin a tel a, National Games-a Tripura medal lak zawng zawng hi ama lak vek a ni. Gold medal panga lai a la a ni.

Northeast state zingah Manipur chu a che ṭha ber an ni a, a vaiin medal 69 an la. Manipur hi Assam-in dawtin medal 25 an la a, Manipur an phak lohna hi a tam hle. Manipur hi a pumpuiah pasarihna an ni.

Medal paruk latu Mizoram

National Games-a Mizoram dinhmun a la hniam rih hle. State 27, Union Territory pali leh sorkar department pakhat telna National Games-ah hian team 32 zingah 27-na an ni.

Mizoram hian gold medal pakhat, silver medal pahnih leh bronze medal pathum an la. Mizoram Football team-in a vawi khatna atan gold medal an la a; anni hian final-ah Punjab 1-0 in an hneh. Weightlifting-ah Lalchhanhimi'n silver medal a la a, ani hi kumin National Games-a Mizoram tana medal la hmasa ber a ni.

Taekwondo lamin kan hmingchhe lutuk tur min chhanhim a; F.Lalrempuii'n silver medal a dawn bakah Kaplianzawni, Lalngaihawmi leh F. Lalmuansangi te'n bronze medal an dawng bawk.

Medal kan lak tlem chhan?

Vanglaini-in Mizo infiammi te hnen aṭanga chhanna kan dawn tam ber chu hmunhma leh hmanrua kan nei ṭha tawk lo' tih a ni. State dang infiammi te'n hmanrua leh inbuatsaihna tur atana thil an dawn ang zawng zawng chu dawng ve thei ngat se chuan tun ai hian Mizoram medal lak zat hi a tam zawk an rin thu an sawi.

Mizoram medal lak zat hi a pumpuia state zinga ti ṭha ber Kerala te nen chuan khaikhin chi a ni hauh lo ang, mahse kan ṭhenawm state Manipur-in medal an lak zat te hi chu sawi ngam tur kan ni. Manipur-in medal an lak zawng zawng zat hi a vaiin 69 a ni a, Mizoramin paruk kan la a, kan phak lohna zat hi 63 a la ni a, 63 chu tam tak a ni.

A bik takin Mizoram tichhe lutuk tur min chhanhimtu Taekwondo player te'n an sawi tam ber chu hmanraw neih ṭhat tawk loh a ni.

Silver medal latu Rempuii chuan, "National Games-ah hian electronic headgear leh electronic safeguard vek kan hmang. Hetiang hi state dang player-te chuan an practice naah an hmang fo a, keini chuan kan vawi khat hman naah National games kan hmachhawn pui nghal a, a hautak a ni. Khatiang kha Mizoramah lo nei pha ve ni ilang chuan tun ai hian kan che ṭha ang, " tiin bronze pathum leh silver pakhat an lak chu a duhkhawp lo hle.

Rempuii thusawi hi Taekwondo coach P.C. Lalbiak­mawia'n a ṭawmpui thu Vanglaini a hrilh bawk.