San Siro-ah Inter leh Milan intawng dawn

Zanin dar 9:30 hian Italy rama stadium hmingthang San Siro-ah inkhel hmuhnawm a awm dawn, Inter Milan leh an hmelma AC Milan ten Serie A match an khel dawn, a boruak a sang dawn - a hmuhnawm bawk ang.

Milan club pahnih hian khelmual an inṭawm a, zanin hian Inter chu a mualneitu zawk an ni dawn - a hmuna entu 1000 chauh an awm dawn avang erawh chuan mualneitu nihin awmzia a nei thui dawn lo.

Zlatan Ibrahimovic-a'n coronavirus a kai, league match hnuhnung berah inlan thei lo mah se a dam tawh. Inter lakah Ibra a inlan thei dawn a, striker palian inlan tur hi a club Milan tan chanchin lawmawm a ni ang.

Season hmasa chawhnu lam khan Ibra hian Milan a zawm a, league match 18 aṭangin goal 10 a khung. Tun season bul ṭannaah pawh goal a khung nghal, zaninah pawh a club hlui Inter tlarhnung tana ven harsa tur bik a ni dawn.

Milan hian tun hnai match an khelh hnuhnung 19-ah chak loh an nei lo, league bikah pawh tun season match thum an khelh tawhah pawh goal chhuah loin an chak vek, inrintawkna sang tak nen an inlan dawn tih a chiang.

Antonio Conte-a'n a team enkawl chu hlawhtlinna chanpui zel a duh, season hmasa khan Inter hi Serie A-ah pahnihna a nih pui a, nomawi an chawi loh avangin Italian manager hian an thlen chin chu engmah lo mai a nih thu a sawi.

Kuminah champion ngei an tum dawn, Chelsea manager hlui hian Romelu Lukaku leh Lautaro Martínez te a hmang thiam hle a, anni pahnih hi club bakah an ram Belgium leh Argentina tana che ṭha lai an nih avangin Milan-in an league goal hmasa ber an chhuah a nih pawhin a mak lo ang.

Milan club pahnih hian sulhnu an nei ṭha a, tun hnai bikah erawh Inter an chungnung. Nerazzurri hian league match bika an intawn hnuhnung prukah vawi nga ngawt hnehna an chang, zaninah pawh rinkai zawk an ni dawn.