ISL khel tur Cole a phur

South African mid-fielder Cole Alexander chuan season thara Indian Super League khel tura a phur tawh thu a sawi a, Odisha FC zawmtu midfielder chuan, "ISL a ka season hmasa ber tur a ni a, fan-te nen zawng zawnga thlirin league phurawm tak niin ka hmu. 

"ISL a ka season hmasa ber tur a nih avangin ISL club dangte chanchin ka hre lutuk lo. Mahse, he league chanchin leh khawvel hmun hrang hrang aṭanga lo kal player-te chanchin chu ka hre nual. 

"League hmathlir nei thui tak leh ṭhang chak tak niin ka hria," a ti - kum 31 mi midfielder hian Odisha tana khel tur hian kum hnih chhung atan contract a ziak a, season hmasa khan South African league sang ber Premier Soccer League club Bidvest Wits tan a khel. 

English coach tawn-hriat nei ṭha Stuart Baxter hnuaia khel tur Odisha hian ram pawn player pasarih chu an nei kim tawh a, Mizo player an kawl nual bawk. 

Odisha hian season hmasaa Aizawl FC tana I League khel Isak Vanlalruatfela leh Paul Ramfangzauva an lalut a, Samuel Lalmuanpuia an lalut tawh bawk.

Daniel Lalhlimpuia leh Jerry Mawihming-thanga chu an player neihsa an ni a, Lalhrezuala Sailung leh CVL Remtluanga an kawl sa bawk a ni.