Champion inring Vikings

Kum 1997 khan Martin-i, Khatla te chhungin Vikings Basketball club hi an din a, tun thlengin Mizoram basketball club ṭha zingah a tel.

Inelna hrang hrangah champion nomawi an chawi tawh a, Mizoram Basketball inelna hrang hrang Sub Junior, Junior leh Men tournament-ah te an lo champion tawh a ni. Kum 2008 khan First division champion an ni a, kum 2012 khan MBBA Cup champion an nih bakah kum 2014 khan second division-ah pahnihna an ni.

Vikings hian player senior leh junior ṭha tak tak an kawl khawm a, national leh state level a inlan tawh player an kat nuk. 2006 Inter VC Tournament-a most promising player Tuikhuahtlang tlangval Lalrina Renthlei an kawl a, Model Veng tlanval Moses Zoremmawia an nei bawk.

Kumin January 6 aṭangin Chawnpui Sports Centre-ah an practice ṭan a, hei bakah hian Inrinniah Gym session an nei ṭhin bawk.

An club jersy hi fan-te'n an lei theih turin an siam a, pakhat man hi Rs 300 a ni. Vikings team hi Khiangte Trade Centre, Chaltlang Lily Veng; Samsung Plaza, Sikulpuikawn; Sunrise Flour Mill, Chhinga Vang ten an sponsor.

Vikings hruaitu H. Lalruaitluanga chuan, "Player leh coaching staff bakah Board Member-te thawhrimna avangin kan champion theih kan inbeisei a, vengchhung mipuiten min thlawp ṭha em em bawk. MSL champion hmasa ber nih kan tum ruh hle. Kan tisual fe a nih loh chuan final kan lut ngei ang," tiin Vanglaini palai a hrilh.